10 ఏళ్లుగా పెండింగ్‌లో ఉన్న పరీక్షల రద్దుకు ప్రభుత్వం సిద్ధంగా లేదని ఆందోళనకారుల ఆరోపణ

జార్ఖండ్‌లో నిరుద్యోగ యువత ఆందోళన మరింత తీవ్రమైంది. జేఎస్‌ఎస్‌సీ సీజీఎల్ 2016 పరీక్ష రద్దు, జేపీఎస్సీ 11 నుంచి 13 బ్యాచ్‌ల నియామకాలపై స్టే, సీబీఐ విచారణ డిమాండ్‌లతో విధానసభ ముట్టడి మార్చ్‌ నిర్వహించిన అభ్యర్థులు ప్రభుత్వ ఉద్దేశం సరిగ్గా లేదని ఆరోపించారు. 2016 ఆగస్టు 21న జరిగిన జేఎస్‌ఎస్‌సీ పరీక్ష ఇప్పటికీ పూర్తికాకుండా 10 సంవత్సరాలుగా పెండింగ్‌లో ఉంది. ఈ పరీక్షను రద్దు చేయాలని విద్యార్థులు కోరుతున్నా ప్రభుత్వం పట్టించుకోవడం లేదు. జేపీఎస్సీ 11 నుంచి 13 బ్యాచ్‌ల ట్రైనింగ్‌ కొనసాగుతోంది. ఈ నియామకాల్లో హరియాణా నుంచి 20 మంది అభ్యర్థులు ఒకే క్లాస్‌రూమ్‌లో ఉండటంపై అనుమానాలు వ్యక్తం అవుతున్నాయి. ఈ అక్రమాలపై సీబీఐ లేదా సీఐడీ విచారణ జరిపించాలని కోరుతున్నా ప్రభుత్వం నిరాకరిస్తోందని ఆందోళనకారులు చెప్పారు. కేవలం 14వ జేపీఎస్సీ బ్యాచ్‌ను రద్దు చేస్తామని మాత్రమే ప్రభుత్వం ప్రకటించింది. చట్టపరమైన ఇబ్బందులు ఉంటే 11-13 బ్యాచ్‌ల నియామకాలపై స్టే విధించి, దర్యాప్తు పూర్తయ్యే వరకు నిలిపివేయాలని వారు డిమాండ్ చేశారు. ‘ప్రభుత్వానికి చిత్తశుద్ధి లేదు. సీట్లు భారీ మొత్తంలో అమ్ముడుపోయాయి’ అని ఓ అభ్యర్థి ఆరోపించాడు.