పులిచింతల విద్యుత్ కేంద్రంలో కాంట్రాక్టు కార్మికుల నిరసన; కొందరి ఆత్మహత్యాయత్నం

సూర్యాపేట జిల్లా చింతలపాలెం మండలంలోని పులిచింతల విద్యుత్ ఉత్పత్తి కేంద్రంలో కాంట్రాక్టు కార్మికులు ఆందోళనకు దిగారు. తమను ఆర్టిజన్ హోదాలో రెగ్యులర్ ఉద్యోగులుగా తీసుకుంటామని ఇచ్చిన హామీని యాజమాన్యం నిలబెట్టలేదని వారు ఆరోపిస్తున్నారు.

నిరసనలో భాగంగా కార్మికులు ప్రాజెక్టు గేటు వద్ద ధర్నా చేశారు. విధులకు హాజరుకాకుండా నిరసన వ్యక్తం చేశారు. కొందరు కార్మికులు తమపై పెట్రోల్ పోసుకుని ఆత్మహత్యాయత్నం చేశారు. పోలీసులు వెంటనే స్పందించి వారిని అడ్డుకున్నారు.

ఘటనాస్థలంలో భారీ పోలీస్ బందోబస్తు ఏర్పాటు చేశారు. యాజమాన్యంతో చర్చలు జరిపి సమస్య పరిష్కరించేందుకు పోలీసులు ప్రయత్నిస్తున్నట్లు తెలిసింది. కార్మికుల డిమాండ్లపై యాజమాన్యం స్పందన ఇంకా రాలేదు.