చంద్రగిరి: ఆడియో లీక్, భూ వివాదంతో రాజకీయం వేడి

తిరుపతి జిల్లా చంద్రగిరి నియోజకవర్గంలో అవిలాల భూవివాదం, టీడీపీ ఎమ్మెల్యే పులివర్తి నాని ఆడియో లీక్ కలకలం రేపాయి.

3.17 ఎకరాల భూమి వివాదంలో మంత్రి అనగాని సత్యప్రసాద్, ఎమ్మెల్యే నాని, రిటైర్డ్ ఆర్డీఓ ద్వారకానాథ్ రెడ్డి, ఆయన భార్య వరజ ఇమిడి ఉన్నారు. ఎస్ఎల్ఎస్ డెవలపర్స్ వెంచర్స్ ప్రాజెక్టులో భూ కబ్జా జరిగిందని వైఎస్ఆర్సీపీ నేతలు ఆరోపించారు. టీడీపీ ఎమ్మెల్యే, మంత్రి ప్రమేయం ఉందన్నారు. ప్రభుత్వం కలెక్టర్ నుంచి నివేదిక కోరింది.

ఇంతలోనే పులివర్తి నాని, కాంగ్రెస్ నేత లోకేశ్‌రెడ్డి మధ్య ఫోన్ సంభాషణ లీకైంది. చెవిరెడ్డి మోహిత్ రెడ్డి తండ్రి భాస్కర్ రెడ్డిపై నాని అనుచిత వ్యాఖ్యలు చేశారని వైఎస్ఆర్సీపీ ఆరోపించింది. చంద్రగిరిలోని ఏడు పోలీస్ స్టేషన్లలో నానిపై చర్యలు తీసుకోవాలంటూ ఫిర్యాదు చేశారు.

అయితే ఆడియో ఎడిట్ చేశారని నాని ఖండించారు. వైఎస్ఆర్సీపీ బురద జల్లిందని, చెవిరెడ్డితో చర్చకు సిద్ధమని సవాలు విసిరారు. ఇనాం భూముల్లో చెవిరెడ్డి పాత్ర ఉందని నాని ఆరోపించారు.

మరోవైపు బాధిత వృద్ధ దంపతులకు మద్దతుగా అఖిల పక్షాలు ఆందోళన చేపట్టాయి. ఉమ్మడి చిత్తూరు జిల్లా వైఎస్ఆర్సీపీ అధ్యక్షుడు భూమన కరుణాకర్ రెడ్డి, సీపీఐ, సీపీఎం, ఎమ్మెల్ నేతలు ఎస్ఎల్ఎస్ డెవలపర్స్ ముందు నిరసన తెలిపారు. దంపతులకు న్యాయం జరిగేవరకు పోరాడతామని భూమన ప్రకటించారు.