భారత్-అమెరికా సంబంధాలు రష్యా-భారత్ సంబంధాలకు సమస్య కాదు: పుతిన్

భారత్-అమెరికా సంబంధాలు రష్యాతో భారత్ సంబంధాలపై ఎలాంటి ప్రతికూల ప్రభావం చూపించవని రష్యా అధ్యక్షుడు వ్లాదిమిర్ పుతిన్ తేల్చి చెప్పారు. భారత్ తన ఆర్థిక ప్రయోజనాలకు అనుగుణంగా అమెరికా సహా అన్ని దేశాలతో సంబంధాలు పెంచుకోవడం సహజమని ఆయన అభిప్రాయపడ్డారు. ఒకవేళ అమెరికా భారత్‌పై రష్యాతో సహకారంపై ఒత్తిడి తెస్తే, అది అంతర్జాతీయ సంబంధాలకు నష్టం చేకూరుస్తుందని పుతిన్ హెచ్చరించారు.

'భారత్, అమెరికాల మధ్య సహకారం వల్ల రష్యా-భారత్ సంబంధాలకు ఇబ్బంది వస్తుందని మీరు అనడం నాకు అర్థం కావడం లేదు. భారత్ అన్ని దేశాలతో సంబంధాలు పెంచుకోవడం మాకెంతో సంతోషకరం. భారత్ ఓ గొప్ప దేశం, 150 కోట్ల జనాభా, పెద్ద ఆర్థిక వ్యవస్థ, అతిపెద్ద ప్రజాస్వామ్యం. దేశం తన ఆసక్తులకు అనుగుణంగా ఆర్థిక వ్యవస్థను అభివృద్ధి చేసుకోవడం సహజమే' అని పుతిన్ తెలిపారు.

అమెరికా కొన్ని విషయాల్లో భారత్‌పై ఒత్తిడి తెస్తోందని, ముఖ్యంగా రష్యాతో సహకారంపై అడ్డుకుంటోందని, కానీ ప్రపంచంలోనే అత్యధిక జనాభా కలిగిన దేశ నేత నరేంద్ర మోదీపై ఒత్తిడి తీసుకురావడం ద్వైపాక్షిక, అంతర్జాతీయ సంబంధాలకు హానికరమని అందరికీ అర్థమైందని ఆయన వివరించారు. 'ఈ ఒత్తిడి ఎక్కడి నుంచి వచ్చినా, దాని వల్ల ఎలాంటి ప్రతికూల పరిణామాలు నేను చూడట్లేదు' అని పుతిన్ స్పష్టం చేశారు.

భారత్ సుదీర్ఘకాలంగా రష్యాతో రక్షణ, ఇంధన రంగాల్లో బలమైన సంబంధాలు కలిగి ఉంది. S-400 క్షిపణి వ్యవస్థ కొనుగోలు వంటి ఒప్పందాలు ఇరు దేశాల మధ్య వ్యూహాత్మక భాగస్వామ్యాన్ని ప్రతిబింబిస్తాయి. మరోవైపు క్వాడ్ వంటి సంస్ధలతో అమెరికాతో సన్నిహిత సంబంధాలు భారత్‌ది. ఈ నేపథ్యంలో పుతిన్ వ్యాఖ్యలు భారత్ స్వతంత్ర విదేశాంగ విధానాన్ని రష్యా గౌరవిస్తుందని సూచిస్తున్నాయి.