ఓబిసీలకు ప్రత్యేక సబ్ ప్లాన్ చట్టం డిమాండ్‌తో ఢిల్లీ జంతర్ మంతర్ వద్ద ఆర్. కృష్ణయ్య ధర్నా

ఢిల్లీలోని జంతర్ మంతర్ వద్ద ఆర్. కృష్ణయ్య నేతృత్వంలో ఓబిసి వర్గాలకు సంబంధించిన అనేక డిమాండ్లతో భారీ ధర్నా నిర్వహించారు. కేంద్ర ప్రభుత్వం ఎస్సీ, ఎస్టీలకు ఉన్నట్లుగా ఓబిసీలకు ప్రత్యేక సబ్-ప్లాన్ చట్టాన్ని తీసుకురావాలని, 2025 జనగణనలో ఓబిసీల కులగణన సమగ్రంగా నిర్వహించాలని, ప్రతి ఓబిసి కులానికి కేంద్ర డేటాబేస్‌లో ప్రత్యేక యూనిక్ ఐడీ కేటాయించాలని డిమాండ్ చేశారు.

అదేవిధంగా పార్లమెంట్, రాష్ట్ర శాసనసభలు, స్థానిక సంస్థల్లో బీసీలకు 34 శాతం రిజర్వేషన్లు కల్పించేలా రాజ్యాంగ సవరణ బిల్లును ప్రస్తుత పార్లమెంట్ సమావేశాల్లో ప్రవేశపెట్టాలని కోరారు. దేశవ్యాప్తంగా వివిధ రాష్ట్రాల నుంచి ఓబిసి సంఘాల ప్రతినిధులు ఈ నిరసనకు హాజరయ్యారు. వర్షాన్ని లెక్కచేయకుండా వారు జంతర్ మంతర్ వద్ద ధర్నా చేపట్టారు.

ఆర్. కృష్ణయ్య మాట్లాడుతూ, "ప్రధానమంత్రి నరేంద్ర మోడీ కూడా ఓబిసి వర్గానికి చెందిన వ్యక్తి. ఈ బిల్లు పాస్ కావాలంటే అన్ని పార్టీలు కలిసి ఒత్తిడి తీసుకురావాలి" అని పిలుపునిచ్చారు. రానున్న వారంలో ప్రధానిని కలిసి ఈ డిమాండ్లను విన్నవించనున్నట్లు కృష్ణయ్య తెలిపారు. ఓబిసి సబ్-ప్లాన్ చట్టం అమలైతే, ఓబిసీల అభివృద్ధికి నిధులు ప్రత్యేకంగా కేటాయించే అవకాశం ఉంటుందని భావిస్తున్నారు.