రాఘవ లారెన్స్ కూతురు రాఘవి దర్శకురాలిగా ఎంట్రీ

కొరియోగ్రాఫర్, నటుడు, దర్శకుడు, నిర్మాత అయిన రాఘవ లారెన్స్ కుమార్తె రాఘవి త్వరలో సినీ రంగంలోకి అడుగుపెట్టనున్నారు. సాధారణంగా నటీనటుల కుటుంబాల వారసులు హీరోయిన్లుగా లేదా నిర్మాతలుగా ఇండస్ట్రీకి పరిచయమవుతుంటారు. కానీ రాఘవి మాత్రం దర్శకురాలిగా రాణించాలని నిర్ణయించుకున్నారు.

రాఘవికి చిన్నప్పటి నుంచి సినిమా నిర్మాణం, స్క్రీన్ ప్లేపై ఆసక్తి ఉండేది. దీంతో ఆమె అమెరికా వెళ్లి డైరెక్షన్ టెక్నాలజీలో ప్రొఫెషనల్ కోర్సును పూర్తి చేశారు. ఇటీవల భారతదేశానికి తిరిగి వచ్చిన రాఘవి, ఎలాంటి అసిస్టెంట్ డైరెక్టర్ అనుభవం లేకుండా నేరుగా డైరెక్టర్ సీట్లో కూర్చోవాలని నిర్ణయించారు.

రాఘవి నిర్ణయానికి లారెన్స్ కూడా ఆమోదం తెలిపారు. ఆమె మొదటి చిత్రాన్ని లారెన్స్ సొంత బ్యానర్ పై భారీ బడ్జెట్‌తో స్వయంగా నిర్మించనున్నారు. ఇప్పటికే సినిమా కథ కూడా రెడీ అయినట్లు సమాచారం. రాఘవి ఎలాంటి సినిమా చేయనుందో త్వరలో వెల్లడించే అవకాశం ఉంది.