పేపర్ లీక్లు, పరీక్షల రద్దుపై రాహుల్ గాంధీ కోటాలో ర్యాలీకి పిలుపు

పరీక్షల పేపర్ లీక్లు, వాటి రద్దు వల్ల లక్షలాది మంది విద్యార్థుల భవిష్యత్తు ప్రశ్నార్థకంగా మారిందని కాంగ్రెస్ నేత రాహుల్ గాంధీ అన్నారు. ఈ సమస్య వ్యవస్థ వైఫల్యం మాత్రమే కాదని, యువత కలలకు ఎదురుదెబ్బ అని పేర్కొన్నారు. కష్టపడి చదివిన విద్యార్థులకు ఫలితం దక్కడం లేదని, కలలు కనడమే నేరంగా మారిందని ఆయన విమర్శించారు.

రేపు రాజస్థాన్ లోని కోటాలో జరగనున్న 'చాత్రూమ్ కి గూంజ్' ర్యాలీకి యువత పెద్ద ఎత్తున తరలి రావాలని రాహుల్ గాంధీ ఎక్స్ (ట్విట్టర్) వేదికగా పిలుపునిచ్చారు. కోటా నుంచి ఈ ఉద్యమాన్ని దేశ నలుమూలలకు తీసుకెళ్దామని రాసుకొచ్చారు. విద్యార్థులకు న్యాయం జరిగే వరకు తాము వారి పక్షానే ఉంటామని హామీ ఇచ్చారు.

ఎన్నికల సమయంలో ప్రత్యేక రైళ్ళు ఏర్పాటు చేసే కేంద్ర ప్రభుత్వం, పరీక్షలకు వెళ్ళే విద్యార్థుల విషయంలో నిర్లక్ష్యంగా ఉంటుందని రాహుల్ గాంధీ విమర్శించారు. ప్రభుత్వం సమస్యలను పట్టించుకోనప్పుడు విద్యార్థులు మరింత గట్టిగా గొంతెత్తాలని ఆయన సూచించారు.