రాహుల్ గాంధీ జెన్ జీతో ముఖాముఖి: విద్య, ఉపాధి, మహిళా రిజర్వేషన్లపై విమర్శ

ప్రయాగ్రాజ్‌లో జరిగిన 'చాత్రోం కి గూంజ్' కార్యక్రమంలో లోక్‌సభ ప్రతిపక్ష నేత రాహుల్ గాంధీ జెన్ జీతో మాట్లాడారు. ఈ సందర్భంగా ఆయన పలు అంశాలపై తన అభిప్రాయాలు వెల్లడించారు.

రాహుల్ గాంధీ మాట్లాడుతూ గత పదేళ్ల ఎన్డీఏ పాలనలో విద్యా వ్యవస్థ దెబ్బతిన్నదని ఆరోపించారు. డిగ్రీలు, పీజీ పూర్తి చేసిన యువతకు తగిన ఉపాధి లభించడం లేదని, ప్రతి వందమంది యువతలో కేవలం 12 మందికే శాశ్వత ఉద్యోగాలు దొరుకుతున్నాయని అన్నారు.

జెన్ జీని సోషల్ మీడియాకు బానిస చేసి ప్రజల సంపదను దోచుకుంటున్నారని విమర్శించారు. బీజేపీ పార్టీ బ్యాంక్ బ్యాలెన్స్ 12 ఏళ్లలో రూ.10 లక్షల కోట్లకు ఎలా చేరిందని ప్రశ్నించారు. భారత ఓటర్ లిస్ట్‌లో బ్రెజిల్ మోడల్ పేరు ఎలా వచ్చిందో పారదర్శకత లేదన్నారు.

రాజ్యాంగ సంస్థలను ఆర్‌ఎస్‌ఎస్, బీజేపీ కబ్జా చేశాయని ఆరోపించారు. యూనివర్సిటీల నుంచి సైన్యం వరకు ప్రతీచోటా ఆర్‌ఎస్‌ఎస్ ఆధిపత్యం కొనసాగుతోందని చెప్పారు.

మహిళలకు కలలు కనే స్వేచ్ఛ కూడా లేకుండా పోయిందని రాహుల్ గాంధీ ఆవేదన వ్యక్తం చేశారు. ఇంట్లోనూ సరైన నిర్ణయాధికారం లేదన్నారు. ఎలాంటి షరతులు లేకుండా మహిళా రిజర్వేషన్లను వెంటనే అమలు చేయాలని డిమాండ్ చేశారు. మహిళల భాగస్వామ్యం లేని అభివృద్ధి అసంపూర్ణమని తేల్చిచెప్పారు.

ఈ సంభాషణ వీడియోను రాహుల్ గాంధీ ఎక్స్ ప్లాట్‌ఫామ్‌లో పోస్ట్ చేశారు.