తెలంగాణకు రెండు రోజుల వర్ష సూచన, 9 జిల్లాలకు ఎల్లో అలర్ట్

తెలంగాణలో వర్షాలు కొనసాగుతున్నాయి. బంగాళాఖాతంలో ఏర్పడిన అల్పపీడనం ప్రభావంతో రాష్ట్రవ్యాప్తంగా వర్షాలు పడుతున్నాయి.

IMD అంచనా ప్రకారం, మరో రెండు రోజుల పాటు రాష్ట్రంలో వర్షాలు కొనసాగే అవకాశం ఉంది. ఈ నేపథ్యంలో, ఇవాళ 9 జిల్లాలకు ఎల్లో అలర్ట్ జారీ చేసింది.

ఆ జిల్లాలు: ఆదిలాబాద్, కొమరంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, సంగారెడ్డి, మెదక్, కామారెడ్డి. ఈ జిల్లాల్లో గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని IMD తెలిపింది.

మిగతా జిల్లాల్లో ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. నిన్న కూడా పలు ప్రాంతాల్లో భారీ వర్షం కురిసింది. కామారెడ్డి జిల్లా బిక్నూర్లో 59.6 మిల్లీమీటర్లు, ములుగు జిల్లా మల్లంపల్లిలో 56.8 మిల్లీమీటర్లు, సిద్దిపేట జిల్లా కొండపాకలో 54.3 మిల్లీమీటర్ల వర్షపాతం నమోదైంది. హైదరాబాద్‌లోనూ అక్కడక్కడ జల్లులు పడ్డాయి.