తెలంగాణలో వర్షాలు: మహబూబాబాద్, నిర్మల్‌లో భారీ వర్షం, నీటిమట్టాలు పెరిగాయి

తెలంగాణ రాష్ట్రంలో అల్పపీడనం ప్రభావంతో విస్తారంగా వర్షాలు కురుస్తున్నాయి. మహబూబాబాద్, నిర్మల్ జిల్లాల్లో భారీ వర్షం పడింది.

మహబూబాబాద్ జిల్లా కొత్తగూడ మండలంలో భారీ వర్షం కురిసింది. శ్రీగుంజేడు ముసలమ్మ తల్లి ఆలయం సమీపంలో వాన దంచికొట్టింది. ఈ సందర్భంలో మంత్రి సీతక్క అమ్మవారికి ప్రత్యేక పూజలు చేశారు. మరింత వర్షం కురవాలని అమ్మవారిని వేడుకున్నారు.

నిర్మల్ జిల్లా కేంద్రంలో ఈదురు గాలులతో కూడిన వర్షం పడింది. హైదరాబాద్ నగరంలో ఉదయం నుంచి మేఘావృతమైన వాతావరణం కొనసాగింది. మధ్యాహ్నం తర్వాత చీకటి వాతావరణం ఏర్పడింది. సికింద్రాబాద్, బోడుప్పల్, మేడిపల్లి, పీజాదిగూడలో మోస్తరు వర్షం కురిసింది. బషీర్బాగ్, అబిడ్స్, కోటి, సైఫాబాద్, నారాయణగూడ, హిమాయత్ నగర్, చిక్కడపల్లి, కాచిగూడలోనూ వాన పడింది. ఉజ్జయిని మహంకాలి అమ్మవారి ఆలయం వద్ద భారీ వర్షం కురవడంతో భక్తులు తీవ్ర ఇబ్బంది పడ్డారు. అసెంబ్లీ సమీపంలో దట్టమైన మేఘాలు కమ్మి చిరుజల్లు కురిసింది.

వర్షాల కారణంగా ప్రధాన రోడ్లు, చౌరస్తాల్లో ట్రాఫిక్ జామ్ అయింది. రోడ్లపై నీళ్లు చేరడంతో వాహనదారులు ఇబ్బందులు ఎదుర్కొన్నారు.

వర్షాలతో కృష్ణ, గోదావరి బేసిన్లలో నీటి మట్టం పెరిగింది. జలాశయాలు నీటితో కళకళలాడుతున్నాయి. అల్పపీడనం ప్రభావంతో మరికొన్ని రోజులు వర్షాలు కురిసే అవకాశం ఉంది.