ఉగ్రవాదానికి మద్దతిచ్చే దేశాలపై ఉపేక్ష వద్దు: రాజనాథ్ సింగ్

ఫిలిపీన్స్‌లోని సెబులో భారత రక్షణ మంత్రి రాజ్‌నాథ్ సింగ్, అమెరికా రక్షణ మంత్రి పీట్ హెగ్సెత్ చర్చలు జరిపారు. ఉగ్రవాద సంస్థలకు శిక్షణ ఇచ్చే, నిధులు సమకూర్చే లేదా మద్దతు ఇచ్చే దేశాలపై ఎలాంటి ఉపేక్ష చూపకూడదని రాజ్‌నాథ్ సింగ్ ఈ సందర్భంగా స్పష్టం చేశారు.

ఉగ్రవాదాన్ని ప్రోత్సహించే దేశాలపై జీరో టాలరెన్స్ విధానం అనుసరించాలని ఆయన పిలుపునిచ్చారు. సరిహద్దుల అవతల నుంచి జరిగే ఉగ్రవాదాన్ని ఎదుర్కోవడంలో భారత్‌కు అమెరికా అండగా ఉంటుందని హెగ్సెత్ పునరుద్ఘాటించారు. ఉగ్రవాదంపై పోరాటంలో అమెరికా అందిస్తున్న నిరంతర మద్దతుకు రాజ్‌నాథ్ సింగ్ కృతజ్ఞతలు తెలిపారు.

గత ఏడాది అక్టోబర్‌లో కుదిరిన 10 ఏళ్ల భారత-అమెరికా రక్షణ సహకార ఒప్పందం అమలులో సాధించిన పురోగతిని ఇరు నేతలు సమీక్షించారు. ఈ ఒప్పందం తొలి వార్షికోత్సవం సందర్భంగా ఈ సమీక్ష జరిగింది. సైనిక సాంకేతికత, సమాచార మార్పిడి, రక్షణ రంగంలో ఉమ్మడి ఉత్పత్తి వంటి అంశాలపై వారు చర్చించారు.

రక్షణ భాగస్వామ్యాన్ని మరింత విస్తరించేందుకు విస్తృత కార్యాచరణ ప్రణాళికను రూపొందించారు. సైనిక దళాల మధ్య సమన్వయం, సముద్ర భద్రత, రక్షణ పరికరాల సరఫరా వ్యవస్థల బలోపేతం, రక్షణ పరిశ్రమల మధ్య సహకారం వంటి అంశాలకు ప్రాధాన్యం ఇచ్చారు. ఇటీవల జరిగిన సంయుక్త సైనిక విన్యాసాలను కూడా ఇరు నేతలు ప్రస్తావించారు.

ఇండో-పసిఫిక్ ప్రాంతంలో వేగంగా మారుతున్న భద్రతా పరిణామాలపై కూడా చర్చ జరిగింది. స్వేచ్ఛాయుత, బహిరంగ, సురక్షిత ఇండో-పసిఫిక్ ప్రాంత నిర్మాణంలో భారత-అమెరికా భాగస్వామ్యం కీలక పాత్ర పోషిస్తుందని వారు పేర్కొన్నారు. ఈ సమావేశాన్ని రాజ్‌నాథ్ సింగ్ సోషల్ మీడియాలో 'అద్భుతమైన సమావేశం' అని అభివర్ణించారు. సమావేశం సంతోషకరమని హెగ్సెత్ కూడా తెలిపారు.

కీలక భద్రతా ఒప్పందాల అమల్లో గణనీయమైన పురోగతి నమోదవుతోందని భారత రక్షణ మంత్రిత్వ శాఖ తెలిపింది. సైనిక దళాల కార్యాచరణ సామర్థ్యం పెంచడం, సాంకేతిక పరిజ్ఞానం పంచుకోవడం, రక్షణ పరిశ్రమల మధ్య సమన్వయం పెంచడం వంటి అంశాలపై కొత్త మార్గాలను అన్వేషించినట్టు మంత్రిత్వ శాఖ పేర్కొంది. భవిష్యత్తులో అదనపు సహకార అవకాశాలను అన్వేషించేందుకు ఇరు నేతలు అంగీకరించారు.

ఆసియాన్ దేశాల రక్షణ మంత్రుల సమావేశంలో పాల్గొనేందుకు ఇరు నేతలు ఫిలిపీన్స్‌లోని సెబుకు వెళ్లారు. ఆ సమావేశం వేదికగా జరిగిన ఈ ద్వైపాక్షిక చర్చలు భారత-అమెరికా రక్షణ సంబంధాల ప్రాధాన్యాన్ని మరోసారి చూపాయి.