రాజోలులో విజిలెన్స్ దాడులు: అధిక ధరలకు బియ్యం అమ్మిన మూడు దుకాణాలపై కేసులు

రాజోలు నియోజకవర్గంలో విజిలెన్స్ అధికారులు ఆకస్మిక తనిఖీలు నిర్వహించారు. ప్రభుత్వ నిబంధన ప్రకారం కేజీ బియ్యం ధర ₹76 ఉండగా, ₹87కి అమ్ముతున్న మూడు దుకాణాలపై కేసులు నమోదు చేశారు.

తాటిపాక, గెద్దాడ, మల్కీపురం మండలం ప్రాంతాల్లో ఈ తనిఖీలు జరిగాయి. ఈ తనిఖీల్లో విజిలెన్స్, GST లీగల్ మెట్రాలజీ, ఫుడ్ ఇన్స్పెక్టర్ బృందాలు పాల్గొన్నాయి.

కేసులు నమోదైన దుకాణాల్లో తాటిపాకలోని రాజ్ రైస్ ట్రేడర్స్, గెద్దాడలోని పద్మావతి ఏజెన్సీ, మల్కీపురం మండలానికి చెందిన షణ్ముఖ రైస్ ఏజెన్సీ ఉన్నాయి. నిబంధనలు పాటించకపోవడంపై ఈ మూడు దుకాణాలపై కేసులు నమోదు చేసినట్లు అధికారులు తెలిపారు.

బియ్యం రకాల వారీగా నిర్ణీత ధరలను అధికారులు వెల్లడించారు. BPT రకం బియ్యం కేజీ ₹66కి, HMT రకం కేజీ ₹76కి, స్వర్ణ మసూరి కేజీ ₹47కి, జై శ్రీరామ బ్రాండ్ బియ్యం కేజీ ₹82కి మాత్రమే అమ్మాలని చెప్పారు. ధరల బోర్డును షాపు ముందు తప్పనిసరిగా ప్రదర్శించాలని సూచించారు.

ప్రజలను దోపిడీ చేస్తూ నిబంధనలకు విరుద్ధంగా అధిక ధరలకు సరుకులు అమ్మితే చట్టపరమైన చర్యలు తప్పవని విజిలెన్స్ సిఐ శేఖర్ బాబు హెచ్చరించారు. అధిక ధరలకు సరుకులు విక్రయిస్తే వెంటనే అధికారులకు ఫిర్యాదు చేయాలని ప్రజలకు విజ్ఞప్తి చేశారు.