రామమందిరం చందా లెక్కింపు సిబ్బందికి కొత్త డ్రెస్ కోడ్: స్మార్ట్ఫోన్లు, బ్యాగులు నిషేధం

అయోధ్య రామమందిరం చందాల లెక్కింపు సిబ్బందికి కొత్త డ్రెస్ కోడ్ అమల్లోకి వచ్చింది. జేబులు లేని ముదురు నీలిరంగు యూనిఫాం, చెప్పులు లేకుండా లెక్కింపు హాల్లోకి ప్రవేశించడం తప్పనిసరి. లెక్కింపు ప్రక్రియలో పారదర్శకత పెంచడానికి, భద్రత కట్టుదిట్టం చేసేందుకు ట్రస్ట్ ఈ నిర్ణయం తీసుకుంది.

మొబైల్ ఫోన్లు, కెమెరాలు, బ్యాగులు సహా అన్ని వ్యక్తిగత వస్తువులను లెక్కింపు హాల్‌లోకి తీసుకెళ్లడంపై కఠిన నిషేధం విధించారు. సిబ్బంది లెక్కింపు హాల్‌లోకి వెళ్లేముందు రెండంచెల భద్రతా తనిఖీ, డబుల్ వెరిఫికేషన్ తప్పనిసరి. విధులు ముగించుకుని బయటకు వచ్చేటప్పుడు కూడా మరోసారి క్షుణ్నంగా తనిఖీ చేస్తారు. ఇకపై టేబుళ్లు, కుర్చీల వద్ద కాకుండా నేలపై కూర్చొని లెక్కింపు జరపాలి.

ఇటీవల రామమందిరం చందాల దొంగతనం కేసు బయటపడిన నేపథ్యంలో ఈ మార్పులు చేపట్టారు. నిందితులను అరెస్ట్ చేసి, ప్రత్యేక దర్యాప్తు బృందం (SIT) విచారణ కొనసాగిస్తోంది. చందాల లెక్కింపు విధానాన్ని పూర్తిగా సమూలంగా మార్చే దిశగా ట్రస్ట్ చర్యలు చేపడుతోంది.

మరోవైపు, ఈ దొంగతనం కేసుతో అయోధ్య ప్రతిష్ఠకు భంగం కలిగిందని, ట్రస్ట్ పనితీరును మెరుగుపరచాలని స్థానిక సాధు సంత్ సమాజం డిమాండ్ చేసింది. రామమందిర ట్రస్ట్‌లో సాధు సంతులకు ప్రాతినిధ్యం కల్పించాలని కోరుతూ సోమవారం జరిగిన సమావేశంలో నిర్ణయం తీసుకున్నారు.