రామాయణ చిత్రం ప్రథమ సంకల్ప ఈవెంట్; వివాదాల నేపథ్యంలో ట్రైలర్ ప్రదర్శన

ఢిల్లీలోని భారత మండపంలో ‘ప్రథమ సంకల్ప’ పేరుతో రామాయణ చిత్ర బృందం ప్రత్యేక కార్యక్రమం నిర్వహించింది. ఎంపిక చేసిన మీడియా ప్రతినిధులకు సుమారు 4 నిమిషాల ట్రైలర్ ప్రదర్శించారు.

ఈ కార్యక్రమంలో దర్శకుడు నితీష్ తివారీ, నిర్మాత నమిత్ మల్హోత్రాతో పాటు రణ్బీర్ కపూర్, సాయి పల్లవి, యశ్, సన్నీ డియోల్, రవి దూబే, రకుల్ ప్రీత్ సింగ్, అరుణ్ గోవిల్, వివేక్ ఒబ్రాయ్ తదితరులు హాజరయ్యారు.

అయితే ఈ చిత్రం ఆదిపురుష్‌తో మొదలైన పురాణ సినిమాల వివాదాల నేపథ్యంలో నిలిచింది. 2023లో విడుదలైన ఆదిపురుష్ పాత్రల రూపకల్పన, సంభాషణలు, విజువల్ ఎఫెక్ట్స్ వంటి అంశాలపై తీవ్ర విమర్శలు ఎదుర్కొన్న సంగతి తెలిసిందే.

రామాయణ ట్రైలర్ విడుదలైన వెంటనే సోషల్ మీడియాలో ప్రధాన చర్చ రణ్బీర్ కపూర్ శ్రీరాముడి లుక్ పై కేంద్రీకృతమైంది. కాషాయ వస్త్రాలు, విల్లు, జంధ్యం ఉన్నప్పటికీ దివ్యమైన గాంభీర్యం కనిపించడం లేదని కొందరు విమర్శించగా, విడుదలకు ముందే తీర్పు చెప్పడం సరికాదని మరికొందరు వాదించారు. సీతగా సాయి పల్లవి ఎంపికపై కూడా భిన్నాభిప్రాయాలు వ్యక్తమయ్యాయి; కొందరు ఆమెలో రాజసం కొరవడిందని, మరికొందరు పాత్ర పవిత్రత, నటనే ప్రధానమని అభిప్రాయపడ్డారు. రావణుడిగా యశ్ లుక్‌పై కూడా విమర్శలు ఉన్నాయి.

ఇదిలా ఉండగా, ఢిల్లీకి చెందిన శ్రీరామలీలా మహాసంఘం సినిమా విడుదలకు ముందే స్పెషల్ స్క్రీనింగ్ ఏర్పాటు చేయాలని కోరుతూ చిత్ర బృందానికి లేఖ రాసింది. గతంలో ఆదిపురుష్ తరహా వివాదాలు పునరావృతం కాకుండా ముందస్తు పరిశీలన అవసరమని సంఘం పేర్కొంది.

చిత్రబృందం మాత్రం రాజా రవివర్మ చిత్రాలు, వాల్మీకి రామాయణం ఆధారంగా కాస్ట్యూమ్ డిజైన్లు రూపొందించినట్లు తెలిపింది. హాలీవుడ్ స్థాయి విజువల్స్‌తో ప్రపంచ వేదికపై భారతీయ ఇతిహాసాన్ని ఆవిష్కరించడమే లక్ష్యమని నితీష్ తివారీ పేర్కొన్నారు. యశ్ మాట్లాడుతూ ‘ఇది కేవలం సినిమా కాదు, భారతదేశం ప్రపంచానికి చెప్పే మహా కావ్యం’ అన్నారు.

ఈ చిత్రం అంతర్జాతీయ వేదికలపై ప్రచారం కోసం కామిక్‌కాన్, ప్రముఖ ఫిల్మ్ ఫెస్టివల్స్ వంటి వేదికలను వినియోగించే ప్రణాళికలు సిద్ధం చేస్తున్నట్లు సమాచారం. సుమారు రూ.4,000 కోట్ల బడ్జెట్‌తో రెండు భాగాలుగా తెరకెక్కుతున్న ఈ ప్రాజెక్టుకు హన్స్ జిమ్మర్, ఏఆర్ రెహ్మాన్ సంగీతం అందిస్తున్నారు.

ప్రేక్షకుల అంచనాలు, వివాదాల మధ్య ఈ చిత్రం విడుదలైన తర్వాతే దాని ప్రామాణికతపై స్పష్టత వస్తుందని సినీ విశ్లేషకులు అభిప్రాయపడుతున్నారు.