రవీనా టండన్ సోదరుడి ఇంట్లో 25 లక్షల విలువైన ఆభరణాల చోరీ; మహిళ అరెస్ట్

గతేడాది అక్టోబర్లో బాలీవుడ్ నటి రవీనా టండన్ సోదరుడు రాజీవ్ టండన్ ఇంట్లో దొంగతనం జరిగింది. ఈ కేసులో పోలీసులు 47 ఏళ్ల రాశి చాబ్రియా అనే మహిళను అరెస్ట్ చేశారు.

పోలీసులు తెలిపిన వివరాల ప్రకారం, రాశి గత కొన్నేళ్లుగా రవీనా తల్లి సంరక్షణ చూసుకుంటూ కుటుంబంతో సన్నిహితంగా మెలిగింది. అక్టోబర్లో కుటుంబ సభ్యులు ఇంట్లోని లాకర్ తెరిచి ఉండటం గమనించారు. లాకర్‌లో ఉన్న బంగారం, వజ్రాల ఆభరణాలు, రెండు ఖరీదైన చేతి గడియారాలు కనిపించలేదు. వీటి మొత్తం విలువ సుమారు రూ.25 లక్షలుగా అంచనా వేశారు.

రాజీవ్ టండన్ ఫిర్యాదు మేరకు జూహు పోలీసులు కేసు నమోదు చేసి దర్యాప్తు మొదలుపెట్టారు. విచారణలో రాశి మొదట ఆరోపణలను ఖండించినా, ఆ తర్వాత నేరాన్ని ఒప్పుకున్నట్లు ఎఫ్ఐఆర్ లో పేర్కొన్నారు. ఆమె రెండు గడియారాలు తిరిగి ఇచ్చేసినా, ఆభరణాలు జగదీష్ అనే వ్యక్తి వద్ద ఉన్నాయని చెప్పింది. అతడిని ఎన్నిసార్లు అడిగినా అవి ఇవ్వకపోవడంతో పోలీసులు లోతుగా విచారణ చేశారు.

పోలీసుల ప్రకారం, రాశి తన సహచరుడిని పోలీస్ ఇన్ఫార్మర్‌గా పరిచయం చేసి, ఆభరణాలు ఇవ్వకపోతే నకిలీ డ్రగ్స్ కేసులో ఇరికిస్తామని బెదిరించింది. ఈ విషయాన్ని రాజీవ్ టండన్ తన ఫిర్యాదులోనూ పేర్కొన్నారు.

గత నెల 21న పోలీసులు రాశి చాబ్రియాను అరెస్ట్ చేసి కోర్టులో హాజరుపరిచారు. కోర్టు ఆమెను 29వ తేదీ వరకు రిమాండ్‌కు పంపించింది. ప్రస్తుతం ఈ కేసులో దర్యాప్తు కొనసాగుతోంది.