EMI చెల్లింపులో జాప్యం చేస్తే ఫోన్ లాక్.. RBI కొత్త మార్గదర్శకాలు జారీ

RBI నూతన మార్గదర్శకాలు విడుదల చేసింది. EMI ద్వారా ఫోన్ కొనుగోలు చేసిన వినియోగదారులు నిర్ణీత తేదీలోగా చెల్లింపు చేయకపోతే, సంబంధిత ఫైనాన్స్ కంపెనీ డిజిటల్ లాకింగ్ సాఫ్ట్‌వేర్ ద్వారా ఫోన్‌ను పాక్షికంగా లేదా పూర్తిగా లాక్ చేయవచ్చని RBI తెలిపింది.

ఫోన్ లాక్ అయినా వ్యక్తిగత డేటా భద్రతకు ఎలాంటి ఢోకా లేదని స్పష్టం చేసింది. ఫైనాన్స్ సంస్థలు ఫోటోలు, వీడియోలు, కాంటాక్ట్‌లు వంటి వ్యక్తిగత సమాచారాన్ని చూడడానికి లేదా కాపీ చేసుకోవడానికి అనుమతి ఉండదు. గతంలో రికవరీ ఏజెంట్ల వేధింపులు ఎదురైన నేపథ్యంలో ఈ డిజిటల్ విధానం వినియోగదారుల గౌరవాన్ని కాపాడుతుందని నిపుణులు భావిస్తున్నారు.

బకాయి EMI మొత్తాన్ని పూర్తిగా చెల్లించిన వెంటనే ఫోన్ ఆటోమేటిక్‌గా అన్‌లాక్ అవుతుందని RBI సూచించింది. ఈ కొత్త రూల్ వచ్చే ఏడాది జనవరి 1 నుంచి అమల్లోకి వస్తుంది. EMI చెల్లింపులు సకాలంలో చేయాలని, ఆలస్యమైతే లేట్ ఫీజులు మరియు క్రెడిట్ స్కోర్‌పై ప్రభావం ఉంటుందని నిపుణులు హెచ్చరిస్తున్నారు.