భార్య మరణంతో ప్రపంచ యాత్ర రద్దు చేసిన రిటైర్డ్ బ్యాంకర్.. ఆర్మీకి రూ.25 లక్షల విరాళం

నాగపూర్ కు చెందిన రిటైర్డ్ బ్యాంక్ ఉద్యోగి శ్రీకాంత్ సహస్త్రబుద్ధి ఇటీవల ఆర్మీ వెల్ఫేర్ ఫండ్ కు రూ.25 లక్షల విరాళం అందజేశారు. పంజాబ్ నేషనల్ బ్యాంక్ లో ఉద్యోగ విరమణ చేసిన శ్రీకాంత్, తన భార్యతో కలిసి ప్రపంచ యాత్ర చేయాలని ప్రణాళిక రూపొందించారు. కానీ 10 సంవత్సరాల క్రితం భార్య మరణించడంతో ఆ ప్రయాణం రద్దు చేసుకున్నారు.

అకోలాకు చెందిన పాడే అనే వ్యక్తి రూ.1 కోటి ఆర్మీకి విరాళం ఇచ్చిన విషయాన్ని వాట్సాప్ లో చూసిన శ్రీకాంత్, తానూ తన రిటైర్మెంట్ బెనిఫిట్స్ నుంచి రూ.25 లక్షలు ఇవ్వాలని నిర్ణయించుకున్నారు. 'మా భార్యతో కలిసి తిరిగే అవకాశం లేకపోయినా, ఈ విరాళం ద్వారా ఆ సంతోషం పొందుతాను' అని ఆయన భావోద్వేగంగా చెప్పారు.

ఈ విరాళం ఆర్మీ సంక్షేమ నిధికి అందించినట్లు సంబంధిత అధికారులు తెలిపారు. శ్రీకాంత్ చేసిన ఈ త్యాగం స్ఫూర్తిదాయకంగా నిలిచింది.