మాదాపూర్‌లో తమ్మిడికుంట చెరువు ప్రారంభం, మూసీ ప్రక్షాళనపై సీఎం రేవంత్ వ్యాఖ్యలు

హైదరాబాద్‌లోని మాదాపూర్‌లో పునరుద్ధరించిన తమ్మిడికుంట చెరువును ముఖ్యమంత్రి రేవంత్ రెడ్డి ప్రారంభించారు. ఈ కార్యక్రమంలో నటుడు నాగార్జున, ఎంపీ కొండా విశ్వేశ్వర్ రెడ్డి పాల్గొన్నారు. కుంభం అనిల్ రెడ్డి, మల్‌రెడ్డి రంగారెడ్డి కూడా హాజరయ్యారు.

మూసీ కాలుష్యం నల్గొండ జిల్లా ప్రజల పాలిట విషంగా మారిందని రేవంత్ రెడ్డి అన్నారు. నల్గొండలో తాను చేపట్టిన పాదయాత్ర సమయంలో ప్రజలు మూసీ సమస్యను తన దృష్టికి తీసుకొచ్చారని ఆయన తెలిపారు.

ఆ ప్రాంతంలో నీళ్లు నల్లగా మారిపోయాయని, ప్రజలు కఠినమైన పరిస్థితులు ఎదుర్కొంటున్నారని సీఎం వివరించారు. నీళ్లు తాగడం, అక్కడ పండిన పంటలు తినడం వల్ల పుట్టే పిల్లల్లో లోపాలు వస్తున్నాయని ఆయన అన్నారు. కొత్తగా పెళ్లయిన కొడుకు, కోడళ్లను గ్రామాల్లో ఉండనివ్వడం లేదని, వారిని ఇతర ప్రాంతాలకు వెళ్లి ఉండమని చెప్తున్నారని రేవంత్ రెడ్డి పేర్కొన్నారు.

తాను చేసే పని వల్ల కొంతమందికి బాధ కలగొచ్చని, కోపం రావచ్చని సీఎం అన్నారు. తనకు ఎలాంటి స్వార్థం లేదని, ప్రజలకు మంచి నగరాన్ని ఇవ్వాలనేదే తన ఆలోచన అని చెప్పారు. మూసీ నదిని ప్రక్షాళన చేయాల్సిందేనని ఆయన స్పష్టం చేశారు. ఏ ఒక్కరికీ నష్టం జరగకుండా చూస్తామని హామీ ఇచ్చారు. భేదాభిప్రాయాలు పక్కన పెట్టి ప్రతిపక్షాలు సహకరించాలని విజ్ఞప్తి చేశారు.

తాము చేస్తున్నది మూసీ సుందరీకరణ కాదు, పునరుజ్జీవం అని సీఎం అన్నారు. చెరువులను ఆక్రమించిన వారి నుంచి విడిపించాల్సిందేనని ఆయన చెప్పారు. రాజకీయాలు ఎన్నికల సమయంలోనే ఉంటాయని, అభివృద్ధి కోసం అందరూ కలిసి రావాలని రేవంత్ రెడ్డి పేర్కొన్నారు. ఎంపీ కొండా విశ్వేశ్వర్ రెడ్డి గురించి మాట్లాడుతూ, రాజకీయ, సిద్ధాంతపరమైన భిన్నాభిప్రాయాలు ఉన్నా కొన్ని విషయాల్లో ఇద్దరి మధ్య ఏకాభిప్రాయం ఉందని సీఎం తెలిపారు.