కొడంగల్ పర్యటన చివరి రోజు హకీంపేటలో సీఎం రేవంత్ రెడ్డి భారీ రైతు సభ

తెలంగాణ ముఖ్యమంత్రి రేవంత్ రెడ్డి తన నియోజకవర్గం కొడంగల్‌లో జరుగుతున్న మూడు రోజుల పర్యటన చివరి రోజు ఇవాళ హకీంపేటలో భారీ బహిరంగ సభ నిర్వహిస్తున్నారు. ఉమ్మడి మహబూబ్‌నగర్, రంగారెడ్డి, మెదక్ జిల్లాల నుంచి వేలాది మంది రైతులు ఈ సభకు తరలి వస్తున్నారు.

మూడో రోజు పర్యటనలో ముఖ్యమంత్రి పలు అభివృద్ధి కార్యక్రమాల్లో పాల్గొంటారు. లగచర్ల ఇండస్ట్రియల్ కారిడార్‌లో ఎకోపామ్ ఆయిల్ ఫ్యాక్టరీకి శంకుస్థాపన చేయనున్నారు. నాచారం గ్రామం నుంచి వేయనున్న రేడియల్ రోడ్డుతో పాటు మరికొన్ని పనులకు కూడా శంకుస్థాపన చేస్తారు.

సభకు దాదాపు 1,500 మంది పోలీసులతో బందోబస్తు ఏర్పాటు చేశారు. పార్టీ శ్రేణులు, అధికార వర్గాలు సభ ఏర్పాట్లను పూర్తి చేశాయి.

రెండో రోజు బొమ్రాస్‌పేటలో ప్రభుత్వ జూనియర్ కళాశాల, పోలీస్ స్టేషన్ నూతన భవనాలను ఆయన ప్రారంభించారు. హకీంపేటలో జూనియర్ కళాశాల, పాఠశాల, ప్రాథమిక ఆరోగ్య కేంద్రాన్ని అందుబాటులోకి తెచ్చారు. కొడంగల్ పోలీస్ స్టేషన్ సర్కిల్ కార్యాలయాలను కూడా ప్రారంభించారు.

పర్సాపూర్ గ్రామంలో సుమిత్రా శ్రీనివాస్ దంపతులు కొత్తగా నిర్మించుకున్న ఇందిరమ్మ ఇంటికి వెళ్లి వారికి కొత్త వస్త్రాలు అందించారు. ఆ ఇంట్లోనే సన్నబియ్యంతో వండిన భోజనం చేశారు.

హకీంపేటలో పెన్షన్ల శిబిరంలో మహిళా స్వయం సహాయక బృందాలతో జరిగిన ముఖాముఖి కార్యక్రమంలో పాల్గొన్నారు. కొత్తగా మంజూరైన పెన్షన్లను పంపిణీ చేశారు. రైతు మేల ఇండస్ట్రియల్ ఎక్స్‌పోను ప్రారంభించి స్టాళ్లను పరిశీలించారు.

కొడంగల్‌లో దీపావళి, జన్మదిన వేడుకలను కూడా ఆయన జరుపుకున్నారు. ఇవాళ సాయంత్రం హకీంపేటలో జరిగే సభలో ముఖ్యమంత్రి రైతులను ఉద్దేశించి ప్రసంగిస్తారు.