ముచ్చింతలలో యతీంద్ర సప్తతి వేడుకలు: రెండో రోజు ఆచార్య వైభవం ప్రత్యేక ఆకర్షణ

ముచ్చింతలలోని శ్రీరామనగరంలో యతీంద్ర సప్తతి వేడుకలు రెండో రోజుకు చేరుకున్నాయి. శ్రీ త్రిదండి రామానుజ చినజీయర్ స్వామి 70వ తిరునక్షత్ర మహోత్సవాన్ని పురస్కరించుకుని ఈ వేడుకలు జరుగుతున్నాయి.

వేద మంత్రాలు, ఆచార్యుల మంగళ శాసనాలు, భక్తుల సందడి మధ్య ఉత్సవాలు కొనసాగుతున్నాయి. రెండో రోజు స్వామి వివిధ సేవా విభాగాల ప్రతినిధులకు మంగళ శాసనాలు అందించి ఆశీర్వదించారు.

దివ్య సాకేతం, BT సేవ, స్టాచూ ఆఫ్ ఈక్వాలిటీ విభాగాల ప్రతినిధులకు ప్రత్యేక ఆశీర్వచనాలు అందాయి. JET ఆస్ట్రేలియా, భారత్, అమెరికా, UBVBP, JIVA, JET చెన్నై ప్రతినిధులు కూడా శాసనాలు అందుకున్నారు. బకాస్ వికాస తరంగిణి, JET UK విభాగాల ప్రతినిధులూ కార్యక్రమంలో పాల్గొన్నారు.

రెండో రోజు ఆచార్య వైభవం కార్యక్రమం ప్రత్యేక ఆకర్షణగా నిలిచింది. ఆచార్య సంప్రదాయం, గురు పరంపర విశిష్టతను ఈ కార్యక్రమం చాటింది.

దేశ, విదేశాల నుంచి సేవా కార్యక్రమాలకు సహకరించే ప్రతినిధులు ఈ వేడుకల్లో పాల్గొన్నారు. కార్యక్రమంలో మై హోమ్ గ్రూప్ చైర్మన్ డాక్టర్ జూపల్లి రామేశ్వరరావు పాల్గొన్నారు.

ప్రతి అమావాస్య రోజు ధన్వంతరి హోమం పూర్ణాహుతి, సుందరకాండ పారాయణం ఇక్కడ క్రమంగా జరుగుతున్నాయి. ఈ కార్యక్రమాలు 18 నెలలుగా కొనసాగుతున్నాయి. దీపావళి సందర్భంగా సమతా మండపంలో జరిగే పారాయణ కార్యక్రమంలో భక్తులు పాల్గొనవచ్చని స్వామి తెలిపారు.