ఖేలో ఇండియా యూత్ గేమ్స్ 2026 ఏర్పాట్లపై సీఎం రేవంత్ రెడ్డి సమీక్ష

తెలంగాణ ప్రభుత్వం ఆతిథ్యం ఇవ్వనున్న ఖేలో ఇండియా యూత్ గేమ్స్ 2026 ఏర్పాట్లపై ముఖ్యమంత్రి రేవంత్ రెడ్డి సమీక్ష నిర్వహించారు. హైదరాబాద్లో డిసెంబర్లో ఈ పోటీలు నిర్వహించేందుకు ప్రణాళికలు రూపొందించాలని ఆదేశించారు.

సమీక్షలో మంత్రి వాకిట శ్రీహరి, క్రీడా శాఖ అధికారులు పాల్గొన్నారు. 20 రకాల క్రీడా పోటీలు నిర్వహించేందుకు ఆయా ప్రదేశాలను గుర్తించాలని సీఎం సూచించారు. ప్రస్తుత స్టేడియాల్లో మౌలిక వసతులను అభివృద్ధి చేసేందుకు నిధులు అందించడానికి ప్రభుత్వం సిద్ధంగా ఉందని స్పష్టం చేశారు.

ప్రారంభ, ముగింపు వేడుకల్లో క్రీడా, సినీ ప్రముఖులను భాగస్వామ్యం చేయాలని, అలాగే తెలంగాణకు చెందిన అర్జున అవార్డు గ్రహీతలు, స్పోర్ట్స్ హబ్ బోర్డు సభ్యులు, ఒలింపిక్స్ అసోసియేషన్స్ ప్రతినిధులను ఆహ్వానించాలని సూచించారు. బాధ్యతలను విభజించి సమన్వయంతో నిర్వహించాలని తెలిపారు.

ఈ జాతీయ స్థాయి క్రీడా ఉత్సవంలో వివిధ రాష్ట్రాల జట్లు పాల్గొంటాయి. క్రీడా స్ఫూర్తిని చాటేలా నిర్వహణ ఉండేలా చర్యలు తీసుకోవాలని ముఖ్యమంత్రి రేవంత్ రెడ్డి దిశానిర్దేశం చేశారు.