రాక్‌స్టార్‌ గేమ్‌ GTA6 లాంచ్‌ తేదీ ఖరారు: 2 బిలియన్‌ డాలర్ల భారీ బడ్జెట్‌తో తయారు

గేమింగ్‌ వరల్డ్‌లో అత్యంత ఆసక్తిగా నిరీక్షిస్తున్న గ్రాండ్‌ థెఫ్ట్‌ ఆటో సిరీస్‌లో ఆరో వెర్షన్‌ అయిన GTA6 లాంచ్‌ తేదీ ఖరారైంది. రాక్‌స్టార్‌ గేమ్స్‌ కంపెనీ 2026 నవంబర్‌ 19న ఈ గేమ్‌ను విడుదల చేస్తున్నట్లు అధికారికంగా ప్రకటించింది. గేమింగ్‌ లవర్స్‌ 13 ఏళ్ళుగా ఎదురుచూస్తున్న ఈ గేమ్‌కు జూన్‌ 25 నుంచే ప్రీ బుకింగ్‌ ఆర్డర్లు అందుబాటులోకి వస్తున్నాయి.

ఈ గేమ్‌ అభివృద్ధికి రాక్‌స్టార్‌ కంపెనీ దాదాపు 2 బిలియన్‌ డాలర్లు వ్యయం చేసింది. బుర్జ్‌ ఖలీఫా నిర్మాణానికి కేవలం ఒకటిన్నర బిలియన్‌ డాలర్లు మాత్రమే ఖర్చయిన నేపథ్యంలో ఈ గేమ్‌ బడ్జెట్‌ విశేష దృష్టిని ఆకర్షిస్తోంది. ఈ గేమ్‌ ధర దాదాపు 80 డాలర్లుగా ఉంటుందని అంచనా వేస్తున్నారు.

గ్రాండ్‌ థెఫ్ట్‌ ఆటో అనేది ఓపెన్‌ వరల్డ్‌ కాన్సెప్ట్‌తో రూపొందిన ప్రసిద్ధ వీడియో గేమింగ్‌ సిరీస్‌. ఈ గేమ్‌లో ఆటగాళ్ళు క్రైమ్‌ వరల్డ్‌లో స్వేచ్ఛగా తిరుగుతూ వివిధ మిషన్లు పూర్తి చేస్తారు. PlayStation మరియు Xbox సిరీస్‌ కన్సోల్లలో ఇది అందుబాటులో ఉంటుంది. వేలాది ఆటగాళ్ళు ఒకేసారి ఈ గేమ్‌ ఆడగలరు.

గతంలో విడుదలైన GTA5 ఇప్పటివరకు 23 కోట్ల కాపీలు అమ్ముడుపోగా, 11 బిలియన్‌ డాలర్ల మేర లాభాలు వచ్చాయి. PlayStation, Xbox, Microsoft Windows వేదికలపై విడుదలైన ఈ గేమ్‌ రికార్డులను GTA6 బ్రేక్‌ చేస్తుందని అంచనా వేస్తున్నారు.

రాక్‌స్టార్‌ పేరెంట్‌ కంపెనీ Take-Two Interactive GTA6 విడుదలతో 2027 ఆర్థిక సంవత్సరం తమకు చారిత్రాత్మకంగా మారుతుందని భావిస్తోంది. కంపెనీ 8 నుంచి 8.2 బిలియన్‌ డాలర్ల రికార్డు స్థాయి నెట్‌ బుకింగ్స్‌ లక్ష్యంగా పెట్టుకుంది. గేమింగ్‌ ఇండస్ట్రీలోనే కాకుండా మొత్తం ఎంటర్టైన్‌మెంట్‌ ఇండస్ట్రీలోనే GTA6 అత్యంత భారీ లాంచ్‌గా నిలిచే అవకాశాలు కనిపిస్తున్నాయి.