గుండెపోటు రాకుండా తీసుకోవాల్సిన జాగ్రత్తలు, లక్షణాలు – కార్డియాలజిస్ట్ వివరణ

గుండెపోటు (హార్ట్ ఎటాక్) రావడానికి గుండె రక్తనాళాల్లో కొవ్వు (కొలెస్ట్రాల్) పేరుకుపోవడం ప్రధాన కారణమని యశోదా హాస్పిటల్స్ సీనియర్ ఇంటర్వెన్షనల్ కార్డియాలజిస్ట్ డాక్టర్ రోహిత్ రెడ్డి వివరించారు.

శారీరక శ్రమ లేకపోవడం, ఫాస్ట్ ఫుడ్ తీసుకోవడం, కాలుష్యం, ఒత్తిడి, నిద్ర లేమి వంటివి ఈ సమస్యను మరింత పెంచుతాయని ఆయన తెలిపారు. డయాబెటిస్, అధిక రక్తపోటు ఉన్నవారిలో గుండెపోటు వచ్చే ప్రమాదం ఎక్కువగా ఉంటుంది.

గుండెపోటు రావడానికి ముందు ఛాతీ నొప్పి, ఎడమ చెయ్యి, భుజం లేదా వెన్నునొప్పి, చెమటలు, గుండె దడ వంటి లక్షణాలు కనిపిస్తాయని డాక్టర్ రోహిత్ రెడ్డి చెప్పారు. డయాబెటిక్ రోగుల్లో నొప్పి లేకుండా సైలెంట్ హార్ట్ ఎటాక్ వచ్చే అవకాశం దాదాపు 40-50% వరకు ఉంటుందని హెచ్చరించారు.

గుండెపోటు వచ్చిన తర్వాత మొదటి 4 గంటలను ‘గోల్డెన్ అవర్’గా పరిగణిస్తారు. ఈ సమయంలో వైద్యం అందితే గుండె కండరానికి నష్టం తగ్గుతుంది. వెంటనే సమీప ఆసుపత్రికి వెళ్లడం, అవసరమైతే డిస్ప్రిన్ వంటి మాత్ర తీసుకోవడం మంచిదని సూచించారు.

బ్లడ్ క్లాట్ను కరిగించే మందులు, యాంజియోగ్రామ్ ద్వారా బ్లాక్ను గుర్తించి స్టెంట్ వేయడం లేదా బెలూన్ తో రక్తప్రసరణ పునరుద్ధరించడం వంటి చికిత్సలు అందుబాటులో ఉన్నాయి. బహుళ బ్లాక్లు ఉంటే ఓపెన్ హార్ట్ బైపాస్ సర్జరీ అవసరం కావచ్చు.

గుండెపోటు నివారణకు ఆరోగ్యకరమైన ఆహారం, క్రమం తప్పని వ్యాయామం తప్పనిసరి. జిమ్‌లో ఒకేసారి విపరీతమైన శ్రమ చేయడం, అనుమతి లేని స్టీరాయిడ్స్ వాడటం కూడా గుండెపై ఒత్తిడి పెంచి ప్రమాదం కలిగిస్తాయని డాక్టర్ హెచ్చరించారు.

డయాబెటిస్, బీపీ ఉన్నవారు, 50 ఏళ్లు దాటిన వారు ప్రతి ఏడాది ECG, 2D Echo, ట్రెడ్‌మిల్ టెస్ట్ చేయించుకోవాలని సిఫార్సు చేశారు. భారతీయ మార్గదర్శకాల ప్రకారం 21 ఏళ్ల తర్వాత ప్రతి ఒక్కరూ ఒకసారి కొలెస్ట్రాల్ పరీక్ష చేయించుకోవడం మంచిది.