Gen Z ఆందోళనలు వ్యవస్థ సవరణే, విద్యకు 6% బడ్జెట్ అవసరమన్న ఆర్ఎస్ఎస్ చీఫ్ మోహన్ భగవత్

ఆర్ఎస్ఎస్ చీఫ్ మోహన్ భగవత్ యువతరం ఆందోళనలను ‘వ్యవస్థ సవరణ’గా అభివర్ణిస్తూ, ప్రస్తుత జనరేషన్ దేశ వ్యతిరేకం కాదని, వారి సమస్యలు నిజమైనవని స్పష్టం చేశారు. ఢిల్లీలో జరిగిన ఒక యువత సమావేశంలో మాట్లాడిన ఆయన, ప్రజాస్వామ్యంలో సంభాషణే మూలమని, నిరసనలను ఎదుర్కోవడం కాకుండా వ్యవస్థను దిద్దుబాటు చేసే అవకాశంగా చూడాలని అన్నారు.

భగవత్ మాట్లాడుతూ, “జెన్ జెడ్ లాజిక్ కోరుతుంది, ఆర్డర్లు కాదు. వారిపై నాకు అంధ విశ్వాసం ఉంది. ఇటీవలి ఘర్షణల గురించి పూర్తి సమాచారం లేకపోయినా, విద్యార్థులను విశ్వసిస్తాను. వీరు దేశ వ్యతిరేకులు కారు.” అని అన్నారు. ఉద్యమాలు వ్యక్తులపై కాకుండా, సిస్టమ్‌ను మెరుగుపరచడానికే ఉండాలని ఆయన సూచించారు. విద్యార్థులపై లాఠీచార్జీ, పెల్లెట్ గన్‌ల వాడకంపై స్పందిస్తూ, తన వద్ద పూర్తి వివరాలు లేవని, కానీ యువత నిజాయితీపరులని తెలిపారు.

విద్యారంగంపై భగవత్ సంచలనాత్మక వ్యాఖ్యలు చేశారు. విద్య వాణిజ్యరంగంగా మారకూడదని, విద్యార్థులపై ఆర్థిక భారం ఎక్కువైందని విమర్శించారు. ఉపాధ్యాయ శిక్షణ పెంచాలని, మొత్తం దేశీయ బడ్జెట్‌లో 6 శాతం విద్యకు కేటాయించాలనే తమ దీర్ఘకాల డిమాండ్‌ను పునరుద్ఘాటించారు. “ఈ లక్ష్యం వాస్తవరూపం దాల్చాలి” అన్నారు.

ఆయన ప్రసంగంలో అంబేద్కర్ రచనలను ప్రస్తావిస్తూ, నిరసన పద్ధతులు రాజ్యాంగంలో సూచించబడ్డాయని గుర్తు చేశారు. “మా తరం పెద్దలు చెప్పింది వినేది, కానీ ఈ తరం ప్రశ్నించి, సమాధానం కోరుతుంది. అది మంచి పరిణామం” అని భగవత్ వ్యాఖ్యానించారు. ప్రస్తుత యువత మరింత నిజాయితీపరమైనదని, దేశభక్తి, సేవల పట్ల ఆకర్షితులవుతారని ఆయన ప్రశంసించారు.