రష్యా క్షిపణి, డ్రోన్ దాడుల్లో కీవ్‌లో 25 మంది మృతి, 90కి పైగా గాయపడ్డారు

ఉక్రెయిన్ రాజధాని కీవ్‌పై రష్యా చేపట్టిన భారీ డ్రోన్, క్షిపణి దాడుల్లో మృతుల సంఖ్య 25కి చేరింది. ఈ దాడిలో 90 మందికి పైగా గాయపడి ఆసుపత్రిలో చికిత్స పొందుతున్నట్లు అధికారులు తెలిపారు.

రష్యా దాడుల కారణంగా కీవ్ నగరంలో దాదాపు 20 నివాస భవనాలు తీవ్రంగా దెబ్బతిన్నాయి. శిథిలాల కింద చిక్కుకున్న వారి కోసం సహాయక చర్యలు కొనసాగుతున్నాయి. దాడి సమయంలో 50 వేల మందికి పైగా ప్రజలు ప్రాణభయంతో సబ్‌వే స్టేషన్లలో తలదాచుకున్నారు.

ఉక్రెయిన్ ఇటీవల చమురు కర్మాగారాలపై చేసిన దాడులకు ప్రతీకారంగానే ఈ దాడి చేపట్టినట్లు రష్యా ప్రకటించింది. ఉక్రెయిన్ డ్రోన్ టెక్నాలజీతో తమ దేశంలో సప్లై రూట్లు, చమురు కర్మాగారాలను లక్ష్యంగా చేసుకుంటోందని, అందుకే ఈ ప్రతీకార దాడి చేశామని రష్యా పేర్కొంది. ఈ దాడి కోసం రష్యా మొత్తం 74 క్షిపణులు, 496 డ్రోన్లు ప్రయోగించినట్లు ఉక్రెయిన్ వైమానిక దళం తెలిపింది.

అమెరికా అధ్యక్షుడు డొనాల్డ్ ట్రంప్ నేతృత్వంలో దౌత్యపరంగా జరుగుతున్న శాంతి ప్రయత్నాలు ఇప్పటికీ ఫలితాలను ఇవ్వలేదు. వచ్చేవారం టర్కీలో జరిగే నాటో సమ్మిట్‌లో ట్రంప్, ఉక్రెయిన్ అధ్యక్షుడు జెలెన్‌స్కీ పాల్గొననున్నారు. ఈ సమ్మిట్‌లో రష్యా దాడుల అంశం చర్చకు వచ్చే అవకాశం ఉంది.