భారత్-ఆఫ్రికా వాణిజ్యం $93 బిలియన్లకు: జైశంకర్

విదేశాంగ మంత్రి S జైశంకర్ ఆఫ్రికా డే 2026 సందర్భంగా ప్రసంగిస్తూ భారత్-ఆఫ్రికా ఆర్థిక సంబంధాలు వేగంగా పెరుగుతున్నాయని తెలిపారు. గత ఆర్థిక సంవత్సరంలో ద్వైపాక్షిక వాణిజ్యం 93 బిలియన్ డాలర్లకు చేరుకుందని వెల్లడించారు. ఆఫ్రికాలో భారత పెట్టుబడులు 80 బిలియన్ డాలర్లు దాటాయని, టెలికాం, ఇంధనం, ఫార్మా, మౌలిక సదుపాయాలు, వ్యవసాయం, డిజిటల్ సేవలు తదితర రంగాల్లో ఈ పెట్టుబడులు విస్తరించాయని వివరించారు. ఆఫ్రికా దేశాల అభివృద్ధి ప్రాధాన్యతలకు అనుగుణంగా సమ్మిళిత సహకారం అందిస్తున్నామని జైశంకర్ పేర్కొన్నారు. భారత ప్రభుత్వం 40కి పైగా ఆఫ్రికా దేశాల్లో ప్రాజెక్టుల కోసం 190 లైన్స్ ఆఫ్ క్రెడిట్ ద్వారా 10 బిలియన్ డాలర్లకు పైగా రుణ సహాయం అందించింది. 4.5 బిలియన్ డాలర్ల విలువైన 220కి పైగా ప్రాజెక్టులు విజయవంతంగా పూర్తయ్యాయని, మరెన్నో పైప్‌లైన్‌లో ఉన్నాయని తెలిపారు. 2015 నుంచి ఆఫ్రికా దేశాలకు గ్రాంట్ సహాయంగా 700 మిలియన్‌ల డాలర్లను మంజూరు చేశామని, వీటిని మౌలిక సదుపాయాలు, వైద్య సహాయం, హెచ్‌ఏడీఆర్ తదితర కార్యకలాపాలకు వినియోగించినట్లు వివరించారు. ముఖ్యంగా సంఘర్షణ ప్రాంతాల్లో కృత్రిమ అవయవాల అమరిక కార్యక్రమం గర్వకారణమని జైశంకర్ అన్నారు. ఆఫ్రికా స్థానిక సామర్థ్యాన్ని పెంచే డిమాండ్ ఆధారిత అభివృద్ధి భాగస్వామ్యానికి భారత్ కట్టుబడి ఉందని చెప్పారు. ఆఫ్రికా ఖండం గొప్ప సంస్కృతి, అవకాశాలకు నిలయమని, భారత్-ఆఫ్రికా సంబంధాలు మరింత బలోపేతం కానున్నాయని జైశంకర్ ఆశాభావం వ్యక్తం చేశారు.