కర్ణాటకలోని శాల్మల నదిలో వెయ్యి శివలింగాలు.. సహస్రలింగ క్షేత్రం ప్రత్యేకత

కర్ణాటకలోని ఉత్తర కన్నడ జిల్లాలో శాల్మల నది మధ్యలో సహజంగా ఏర్పడిన శిలలపై సుమారు వెయ్యి శివలింగాలు చెక్కబడి ఉన్నాయి. ఈ ప్రాంతాన్ని సహస్రలింగ క్షేత్రం అని పిలుస్తారు. సిర్సీ పట్టణానికి దాదాపు 14 కిలోమీటర్ల దూరంలో ఇది ఉంది.

నది ప్రవాహంలోని నీరే ఈ శివలింగాలపై నిరంతరం అభిషేకం చేస్తున్నట్టు ఉంటుంది. దాదాపు ప్రతి శివలింగం పక్కన నంది విగ్రహాలు కూడా చెక్కి ఉన్నాయి. భక్తులు నది మధ్యలోకి వెళ్లి ఆ నీటితోనే స్వామిని అభిషేకిస్తారు.

ఈ క్షేత్రం వెనుక ఒక కథనం ప్రచారంలో ఉంది. విజయనగర సామ్రాజ్య పాలకుడు సదాశివరాయులు తన యాత్రలో ఈ ప్రాంతానికి వచ్చారని చెబుతారు. నదిలోని శిలలను చూసి ఆశ్చర్యపోయిన ఆయన, ఈ ప్రాంతానికి ఆధ్యాత్మిక ప్రాధాన్యం తెచ్చేందుకు శిలలపై శివలింగాలు, నంది విగ్రహాలు చెక్కించినట్టు స్థానిక కథనం చెబుతోంది.

మరో కథనం ప్రకారం సోండా లేదా స్వాడి రాజు ఆకాశప్ప నాయకుడికి సంతానం లేదు. సంతానం కోసం 1008 శివలింగాలు తయారు చేయాలని ఒక పురోహితుడు ఆయనకు సలహా ఇచ్చాడట. దాంతో శాల్మల నది ఒడ్డున ఉన్న ప్రతి రాయిని శివలింగంగా మార్పించారని చెబుతారు. ఆ తర్వాత ఆయనకు సంతానం కలిగిందని, ఈ లింగాలను హిందీలో ఇచ్ఛాపూర్తి శివలింగాలు అంటారని కథనం పేర్కొంటోంది.

కార్తీక మాసంలో, మహాశివరాత్రి సమయంలో చుట్టుపక్కల రాష్ట్రాల నుంచి వేల సంఖ్యలో భక్తులు ఇక్కడికి వస్తారు. పరమేశ్వరుడిని పూజించి, ప్రకృతి అందాలను కూడా ఆస్వాదిస్తారు.

17వ శతాబ్దానికి చెందిన శ్రీ మరికాంబ దేవాలయం ఇక్కడ మరో ప్రధాన ఆకర్షణ. ఈ విగ్రహం సిర్సీ పట్టణ పరిధిలోని ఒక నీటి సరస్సులో లభించిందని కథనం. 1611లో అప్పటి పాలకుడు సదాశివరావు ఈ చెక్క విగ్రహాన్ని ఇక్కడ ప్రతిష్ఠించారని చెబుతారు.

మరికాంబను దర్శించుకునే భక్తులు పక్కనే ఉన్న గోపాలకృష్ణుడిని కూడా దర్శించుకోవచ్చు. ప్రతి గురువారం ఇక్కడ భక్తుల ప్రశ్నలకు సమాధానాలు చెబుతారని చెప్తారు.

సిర్సీకి 30 కిలోమీటర్ల దూరంలో సిద్ధాపూర్ తాలూకాలో ఉంచెల్లి జలపాతాలు ఉన్నాయి. 1845లో అప్పటి బ్రిటిష్ ప్రభుత్వ జిల్లా కలెక్టర్ J.D. లషింగ్టన్ ఈ జలపాతాలను మొదటిసారిగా గుర్తించారు.