నీటి దుర్వినియోగంపై ఫిర్యాదులకు 'Save Water Warriors' వెబ్‌సైట్ ప్రారంభం

నీటి దుర్వినియోగాన్ని అరికట్టేందుకు ప్రభుత్వం 'Save Water Warriors' వెబ్‌సైట్‌ను ప్రారంభించింది. ఈ వెబ్‌సైట్‌లో ఎవరైనా వాలంటీర్‌గా చేరవచ్చని మంత్రి పొన్నం ప్రభాకర్ తెలిపారు.

నీటిని వృధా చేసే వారిపై ఫిర్యాదు చేయాలని మంత్రి సూచించారు. నల్ల నీటిని వృధాగా వదలడం, వాహనాలు కడుక్కోవడం, పైపులతో ఫ్లోర్ క్లీన్ చేయడం, ట్యాంక్ నిండినా మోటార్ ఆపకపోవడం వంటివి ఆయన ఉదాహరణలుగా చెప్పారు. ఫిర్యాదుతో పాటు ఫోటోలు, వీడియోలు అప్‌లోడ్ చేయాలి. ఫిర్యాదు చేసిన వారి వివరాలను గోప్యంగా ఉంచుతారు.

దుర్వినియోగం చేసే వారికి భారీ జరిమానాలు విధిస్తారు. వృధా చేసిన స్థాయిని బట్టి అవసరమైతే నల్లా కనెక్షన్‌ను కూడా కట్ చేస్తారు.

జలమండలి సిబ్బందితో మాత్రమే అన్ని ప్రాంతాల్లో దుర్వినియోగాన్ని గుర్తించడం కష్టమని మంత్రి అన్నారు. అందుకే ప్రజలను భాగస్వాములను చేస్తున్నామని ఆయన తెలిపారు. జరిమానాలు విధించడం కంటే దుర్వినియోగం జరగకుండా నిరోధించడమే తమ లక్ష్యమని చెప్పారు.

RTI యాక్టివిస్టులు, పాత్రికేయులు, అధికారులు, వివిధ సంఘాల ప్రతినిధులు ఈ కార్యక్రమంలో చేరవచ్చు. దుర్వినియోగాన్ని అరికట్టడంలో సాయపడిన వాలంటీర్లను భవిష్యత్తులో ముఖ్యమంత్రి స్వయంగా అభినందిస్తారని మంత్రి పొన్నం ప్రభాకర్ తెలిపారు. నీటి పొదుపుపై ముఖ్యమంత్రి కూడా ఇటీవల ప్రస్తావించారని ఆయన పేర్కొన్నారు.

వాలంటీర్‌గా పని చేయాలనుకునే వారు ఏదైనా ID కార్డుతో వాటర్ బోర్డ్ వెబ్‌సైట్‌లో 'Save Water Volunteer'గా నమోదు చేసుకోవాలి.