ప్రకాశం జిల్లాలో ఛార్జింగ్‌లో సెల్‌ఫోన్ పేలి ఇంట్లో వస్తువులు కాలిపోయాయి

ప్రకాశం జిల్లాలోని గుట్లూరు మండలం పాజర్ల గ్రామంలో ఛార్జింగ్‌లో ఉన్న సెల్‌ఫోన్ పేలిపోయింది. ఈ ఘటనలో ఇంట్లోని వస్తువులు పూర్తిగా కాలిపోయాయి. ప్రాణనష్టం జరగలేదు.

సెల్‌ఫోన్‌కు ఛార్జింగ్ పెట్టి ఇంటి యజమాని తిరుమల కూలి పనికి వెళ్లారు. ఆయన తిరిగి వచ్చేసరికి ఇల్లంతా పొగతో నిండిపోయి ఉంది. తలుపు కూడా కాలిపోయింది. లోపలికి వెళ్లి చూడగా సెల్‌ఫోన్ పేలిపోయి, ఆ మంట ఇంట్లోకి వ్యాపించినట్టు గుర్తించారు.

మంచం, పరుపులు, దుప్పట్లు, ప్లాస్టిక్ వస్తువులు, కుర్చీలు మంటల్లో కాలిపోయాయి. మంటల తీవ్రతకు గోడలకు బీటలు వారాయి. కొన్ని ప్లాస్టర్ ముక్కలు కింద పడిపోయాయి.

పొగ, మంటలను చూసి చుట్టుపక్కల వారు భయాందోళనకు గురయ్యారు. గ్యాస్ సిలిండర్ పేలిందా అని కొందరు అనుమానించారు. ఘటన సమయంలో ఇంట్లో ఎవరూ లేకపోవడంతో ప్రాణనష్టం తప్పింది. జరిగిన ఆస్తి నష్టంపై తిరుమల ఆవేదన వ్యక్తం చేశారు.

సెల్‌ఫోన్ పూర్తిగా ఛార్జ్ అయిన వెంటనే ప్లగ్ తీసేయాలని కొందరు అభిప్రాయం వ్యక్తం చేస్తున్నారు. ఛార్జింగ్‌లో ఉన్న ఫోన్‌ను గమనిస్తూ ఉండాలని, నిర్లక్ష్యం చేస్తే ప్రమాదాలు జరిగే అవకాశం ఉందని వారు చెప్తున్నారు.