వరంగల్, రంగారెడ్డిలో ఫుడ్ సేఫ్టీ దాడులు: 5,555 కిలోల ఆహార పదార్థాలు సీజ్

ఉమ్మడి వరంగల్, రంగారెడ్డి జిల్లాల్లో టీజీ సేఫ్ అధికారులు ఏకకాలంలో దాడులు నిర్వహించారు. 10 ప్రత్యేక బృందాలతో 20 ఆహార తయారీ కేంద్రాల్లో సోదాలు చేశారు. ఈ సోదాల్లో 5,555 కిలోల ఆహార పదార్థాలను సీజ్ చేశారు. వాటి విలువ దాదాపు ₹5.89 లక్షలు ఉంటుందని అధికారులు తెలిపారు.

నిబంధనలు ఉల్లంఘించిన కేంద్రాలపై అధికారులు చర్యలు తీసుకున్నారు. తొమ్మిది ఆహార తయారీ కేంద్రాల లైసెన్సులను రద్దు చేశారు. ఆ కేంద్రాల వ్యాపార కార్యకలాపాలను వెంటనే నిలిపివేయాలని ఆదేశించారు. మరికొన్ని కేంద్రాలకు ఇంప్రూవ్‌మెంట్ నోటీసులు జారీ చేశారు. 21 ఆహార శాంపిల్‌లను సేకరించి పరీక్షల కోసం ల్యాబ్‌కు పంపినట్టు అధికారులు చెప్పారు.

సోదాల్లో పలు రకాల ఉల్లంఘనలు బయటపడ్డాయి. గడువు ముగిసిన ఆహార పదార్థాలు, బూజు పట్టిన వస్తువులు గుర్తించారు. కొన్ని చోట్ల యంత్రాలు పరిశుభ్రంగా లేవని అధికారులు తెలిపారు. కొన్ని కేంద్రాల్లో బొద్దింకలు, ఈగలు, ఎలుకల సంచారం ఉన్నట్టు గుర్తించారు. బరువు మించిన పాలు, లేబుల్ లేని ఐస్ క్రీం బాక్స్‌లు కూడా లభించినట్టు అధికారులు పేర్కొన్నారు.

రాష్ట్రవ్యాప్తంగా తనిఖీలు కొనసాగుతాయని టీజీ సేఫ్ అధికారులు తెలిపారు. హోటళ్లు, పబ్‌లు, రెస్టారెంట్లు, ఆహార తయారీ కేంద్రాలపై ప్రత్యేక దృష్టి ఉంటుంది. లోపాలు ఉన్నట్టు తేలితే లైసెన్సులు రద్దు చేస్తామని చెప్పారు. కొంతమేర నిబంధనలు పాటిస్తే ఇంప్రూవ్‌మెంట్ నోటీసులు ఇస్తామని పేర్కొన్నారు.