యారాడ నేవీ క్వార్టర్స్‌లో గ్రీన్ పిట్ వైపర్: స్నేక్ క్యాచర్ రెస్క్యూ

విశాఖపట్నం యారాడలోని డాల్ఫిన్ హిల్స్ ప్రాంతంలో ఉన్న నేవీ క్వార్టర్స్‌లో గ్రీన్ పిట్ వైపర్ పాము కనిపించింది. ఒక కుటుంబం ఇంటి బయట పెరిగిన తీగ జాతి మొక్కల మధ్య ఈ పాము ఉంది.

ఆ మొక్కల మధ్య నుంచి అలికిడి రావడంతో ఇంట్లో ఉన్నవారు దగ్గరకు వెళ్లి చూశారు. లేత ఆకుపచ్చ రంగులో చుట్ట పెట్టుకుని ఉన్న పాము వారికి కనిపించింది. వెంటనే స్నేక్ క్యాచర్ నాగరాజుకు సమాచారం అందించారు.

నాగరాజు ఘటనా స్థలానికి వచ్చి ఆ పామును రెస్క్యూ చేశారు. ఇది గ్రీన్ పిట్ వైపర్ జాతి పాము. ఈ జాతి పాము కాటు వేస్తే తీవ్రమైన నొప్పి కలుగుతుంది. కాటు వేసిన చోట రక్తస్రావం, వాపు కూడా వస్తాయి.

గ్రీన్ పిట్ వైపర్‌ను గుర్తించడం కాస్త కష్టం. దీని తల త్రిభుజాకారంలో, దృఢంగా ఉంటుంది. శరీరం సన్నగా, పొడవుగా ఉంటుంది. ముఖం చివర పదునుగా ఉంటుంది. రంగు లేత ఆకుపచ్చ నుంచి ముదురు ఆకుపచ్చ వరకు ఉంటుంది.

చెట్లపై సాధారణంగా కనిపించే పసరిక పాములా కాకుండా ఇది దృఢంగా ఉంటుంది. ఆకుల రంగులో కలిసిపోయే ఈ పాము శబ్దం చేసినప్పుడు తప్ప, అక్కడ పాము ఉందని తెలియదు.