స్కూల్ బస్సుల తనిఖీలో 200+ కేసులు, 40+ బస్సులు సీజ్: జాయింట్ ట్రాన్స్‌పోర్ట్ కమిషనర్

రాష్ట్రవ్యాప్తంగా స్కూల్ బస్సులపై రవాణా శాఖ పెద్ద ఎత్తున తనిఖీలు నిర్వహించింది. ఈ తనిఖీలో 200కు పైగా కేసులు నమోదుకాగా, 40కి పైగా బస్సులను అధికారులు సీజ్ చేశారు.

ఈరోజు విద్యాసంస్థలు తిరిగి ప్రారంభమయ్యాయి. ఈ నేపథ్యంలో విద్యార్థులను తరలించే వాహనాలపై రవాణా శాఖ ప్రత్యేక దృష్టి పెట్టింది. జాయింట్ ట్రాన్స్‌పోర్ట్ కమిషనర్ చంద్రశేఖర్ గౌడ్ మాట్లాడుతూ, రాష్ట్రంలో దాదాపు 25,000 ప్రైవేట్ స్కూల్ వాహనాలు ఉండగా, 23,000 (90%) ఫిట్నెస్ సర్టిఫికెట్లు పొందాయని తెలిపారు. మిగిలిన 2,000 వాహనాలు స్క్రాప్, రిపేర్ లేదా రోడ్డుపైకి రాకపోవడం వల్లే ఫిట్నెస్ లేకుండా ఉన్నాయని చెప్పారు.

ఈరోజు ఒక్కరోజే 1,000కి పైగా వాహనాలను తనిఖీ చేయగా, 200కి పైగా కేసులు నమోదయ్యాయి. ఫిట్నెస్ లేని 40కి పైగా బస్సులు సీజ్ చేశారు. ఫస్ట్ ఎయిడ్ బాక్స్, డ్రైవింగ్ లైసెన్స్, ఎమర్జెన్సీ ఎగ్జిట్ వంటి నిబంధనలు ఉల్లంఘించిన వాటిపై ఈ చర్యలు తీసుకున్నారు. స్కూల్ యాజమాన్యాలు బస్సుల ఫిట్నెస్, డ్రైవర్ల లైసెన్స్ ని తాము కూడా పరిశీలించాలని కమిషనర్ విజ్ఞప్తి చేశారు. డ్రంక్ అండ్ డ్రైవ్ చేసిన డ్రైవర్లపై క్రిమినల్ కేసు నమోదు చేసి, లైసెన్స్ రద్దు చేస్తామని హెచ్చరించారు.

రాష్ట్రవ్యాప్తంగా 33 జిల్లాల్లో మోటార్ వాహన శాఖ అధికారులతో పాటు, మంత్రి పొన్నం ప్రభాకర్ ఆదేశాలతో 12 మొబైల్ స్క్వాడ్లు ఈ తనిఖీల్లో పాల్గొంటున్నాయి. ఈ ప్రత్యేక తనిఖీలు నిరంతరం కొనసాగుతాయని, ముఖ్యంగా ఆటో రిక్షాలు, ఓమ్నీ బస్సుల్లో ఓవర్లోడ్ పట్టుబడితే వాటిని సీజ్ చేస్తామని కమిషనర్ స్పష్టం చేశారు. పదేపదే నిబంధనలు ఉల్లంఘిస్తే వాహనం రిజిస్ట్రేషన్, డ్రైవింగ్ లైసెన్స్ సస్పెండ్ చేస్తామని, అవసరమైతే రద్దు చేస్తామని చెప్పారు.

తల్లిదండ్రులు కూడా పరిమితికి మించి విద్యార్థులను ఆటోలు, ఓమ్నీ బస్సుల్లో పంపొద్దని కమిషనర్ సూచించారు. సీజ్ చేస్తే విద్యార్థుల అకడమిక్ కార్యకలాపాలకు ఇబ్బంది కలుగుతుందని హెచ్చరించారు.