ఎఫ్‌అండ్‌ఓ స్టాక్స్‌కు సెబీ కొత్త క్లోజింగ్ ఆక్షన్ నిబంధనలు అమలు: ట్రేడింగ్‌పై ప్రభావం ఇదే

ఎఫ్‌అండ్‌ఓ సెగ్మెంట్‌లో షేర్ల క్లోజింగ్ ధరల నిర్ణయంపై సెబీ సరికొత్త విధానం ఈ వారం సోమవారం నుంచి అమల్లోకి వచ్చింది. ఇకపై బీఎస్‌ఈ, ఎన్‌ఎస్‌ఈల్లో ఎఫ్‌అండ్‌ఓ స్టాక్స్ కోసం ప్రత్యేక క్లోజింగ్ ఆక్షన్ సెషన్ ఉంటుంది. మార్కెట్ సాధారణ సమయంలో ట్రేడింగ్ ఆగిన తర్వాత మధ్యాహ్నం 3:15 నుంచి 3:30 మధ్య ఈ ఆక్షన్ నిర్వహిస్తారు. ఈ 15 నిమిషాల్లో అన్ని కొనుగోలు, అమ్మకపు ఆర్డర్లు సేకరించి, ఒకే ధర వద్ద మ్యాచింగ్ చేస్తారు. గరిష్టంగా ఎక్కువ ట్రేడ్లు జరిగేలా ఈ ధరను నిర్ణయిస్తారు. అదే స్టాక్ అధికారిక క్లోజింగ్ ధరగా మారుతుంది.

కొత్త నిబంధనలతో పెద్ద ఎఫ్‌అండ్‌ఓ ఆటగాళ్లు చివరి నిమిషాల్లో పెద్ద ఆర్డర్లు పెట్టి ధరలను తారుమారు చేయడం కష్టమవుతుంది. దీంతో మార్కెట్ అస్థిరత తగ్గి, ఇండెక్స్ మానిప్యులేషన్ చాలా క్లిష్టంగా మారుతుంది. పాసివ్ ఫండ్లకు క్లీనర్ క్లోజింగ్ ధర లభిస్తుంది. హై-ఫ్రీక్వెన్సీ ట్రేడర్లు, జాబర్లకు మాత్రం క్లోజింగ్ సెషన్లో కొంత లిక్విడిటీ కోల్పోయే అవకాశం ఉంది. మొత్తంగా ఈ విధానం న్యూయార్క్, లండన్ స్టాక్ ఎక్స్ఛేంజీలతో సమానంగా మార్కెట్లను మరింత దృఢంగా చేస్తుంది.

బ్రోకింగ్ ఆదాయంపై ఈ మార్పు స్వల్ప ప్రభావం చూపుతుంది. ఏంజెల్ వన్, గ్రో, ఎంఓఎస్‌ఎల్ వంటి బ్రోకర్లకు ఇది నెగటివ్. వాటి బ్రోకింగ్ ఆదాయంలో 1 నుంచి 3 శాతం దాకా తగ్గొచ్చని అంచనా. బీఎస్‌ఈ, ఎన్‌ఎస్‌ఈలపై చాలా వరకు తటస్థ ప్రభావమే. సీడీఎస్‌ఎల్, ఎన్‌ఎస్‌డీఎల్, కే-ఫిన్‌టెక్ వంటి అనుబంధ సంస్థలకూ పెద్దగా మార్పు లేదు. జిరోధా సహ వ్యవస్థాపకుడు నితిన్ కామత్ ట్వీట్ చేస్తూ, తమ బ్రోకింగ్ ఆదాయంలో 1 నుంచి 5 శాతం ప్రభావితం కావొచ్చని తెలిపారు.