సికింద్రాబాద్ మహంకాళి బోనాల ఉత్సవాలు: నేడు రంగం, ఏనుగు అంబారీపై ఘట ఊరేగింపు

సికింద్రాబాద్ ఉజ్జైని మహంకాళి అమ్మవారి లష్కర్ బోనాల ఉత్సవాల్లో భాగంగా ఈరోజు రంగం కార్యక్రమం నిర్వహించనున్నారు. ఏనుగు అంబారిపై అమ్మవారి ఘటాలను ఊరేగింపుగా తీసుకెళ్తారు.

నిన్న జరిగిన బోనాల సమర్పణ కార్యక్రమం ఘనంగా ముగిసింది. తెల్లవారుజాము నుంచే భక్తులు భారీ సంఖ్యలో ఆలయానికి చేరుకుని అమ్మవారికి బోనాలు సమర్పించారు. వండి తెచ్చిన నైవేద్యాన్ని నివేదించి మొక్కులు తీర్చుకున్నారు. శివశక్తి పూనకాలు, పోతరాజుల విన్యాసాలతో ఆలయ ప్రాంగణం కోలాహలంగా మారింది.

మంత్రి పొన్నం ప్రభాకర్ ఉదయాన్నే అమ్మవారికి తొలి బోనం సమర్పించారు. మధ్యాహ్నం ముఖ్యమంత్రి రేవంత్ రెడ్డి మంత్రులు సీతక్క, కొండా సురేఖతో కలిసి ప్రభుత్వం తరపున పట్టు వస్త్రాలు, బంగారు బోనం సమర్పించారు.

భక్తుల రద్దీ నేపథ్యంలో అధికారులు ఆరు క్యూ లైన్లు ఏర్పాటు చేశారు. ఇందులో బోనాలతో వచ్చే మహిళలకు రెండు, సాధారణ దర్శనానికి రెండు, వీఐపీలకు రెండు లైన్లు ఉన్నాయి. ప్రశాంత వాతావరణం కోసం పోలీసులు పటిష్ట బందోబస్తు ఏర్పాటు చేశారు. కమాండ్ కంట్రోల్ రూమ్ నుంచి సీసీ కెమెరాల ద్వారా పరిసర ప్రాంతాలను నిరంతరం పర్యవేక్షించారు.

ఈరోజు రంగం కార్యక్రమం నేపథ్యంలో సికింద్రాబాద్‌లో ట్రాఫిక్ ఆంక్షలు కొనసాగుతున్నాయి.