మేడారం పెండింగ్‌ పనులు 10 రోజుల్లో పూర్తి చేయాలని మంత్రి సీతక్క ఆదేశం

మేడారంలో పెండింగ్‌లో ఉన్న పనులు పది రోజుల్లో పూర్తి చేయాలని మంత్రి సీతక్క ఆదేశించారు. ములుగు జిల్లా కలెక్టరేట్‌లో జరిగిన సమీక్ష సమావేశంలో ఈ ఆదేశాలు జారీ చేశారు.

ముఖ్యమంత్రి రేవంత్ రెడ్డి త్వరలో ములుగు జిల్లాలో పర్యటించనున్నారు. వరద ప్రభావిత ప్రాంతాల పర్యటన ఏర్పాట్లపై సమావేశంలో చర్చించారు. ఈ సందర్భంగా రూ.6,000 కోట్లకు పైగా పంచాయతీరాజ్ శాఖ అభివృద్ధి పనులను సీఎం ప్రారంభించనున్నారు. ములుగు కలెక్టరేట్ భవనం, మెడికల్ కాలేజ్, నర్సింగ్ కాలేజ్, కేంద్రీయ విద్యాలయం వంటి ప్రాజెక్టుల ప్రారంభోత్సవానికి ఏర్పాట్లు జరుగుతున్నాయి.

మేడారం సమ్మక్క-సారలమ్మ జాతర సమయంలో చేపట్టిన కొన్ని పనులు పూర్తికాకుండా మిగిలిపోయాయి. ముఖ్యమంత్రి రేవంత్ రెడ్డి మరోసారి మేడారం సందర్శించే అవకాశం ఉండడంతో, ఈ పెండింగ్ పనులు పది రోజుల్లో పూర్తి చేయాలని మంత్రి సీతక్క అధికారులకు ఆదేశించారు.

అదే సమయంలో, భారీ వర్షాలు కురుస్తున్న నేపథ్యంలో వరద ప్రభావిత ప్రాంతాల్లో అప్రమత్తంగా ఉండాలని, సహాయక చర్యలకు సిద్ధంగా ఉండాలని ఆదేశించారు. రాష్ట్రవ్యాప్తంగా పంచాయతీరాజ్ శాఖ పనులకు రూ.6,000 కోట్లు కేటాయించినట్లు మంత్రి తెలిపారు.