తమిళనాడు: TVK ప్రభుత్వాన్ని కూల్చే కుట్ర ఆరోపణలు.. 9 మంది అరెస్ట్, మాజీ మంత్రి పరారీ

తమిళనాడులో TVK ప్రభుత్వాన్ని కూల్చేందుకు కుట్ర జరిగిందన్న ఆరోపణలపై పోలీసులు దర్యాప్తు ప్రారంభించారు. TVK ఎమ్మెల్యే ఇలయరాజా ఇచ్చిన ఫిర్యాదు మేరకు కేసు నమోదు చేసిన పోలీసులు, ఇప్పటివరకు 9 మందిని అరెస్టు చేశారు. ఈ కేసులో మాజీ మంత్రి సెల్ బాలాజీ, ఆయన సోదరుడు అశోక్ కుమార్లు ప్రధాన నిందితులుగా గుర్తించగా, వారు పరారీలో ఉన్నారు.

పోలీసుల విచారణలో గిండీలోని ఒక హోటల్లో నిందితులు వారం రోజులపాటు బస చేసినట్లు తేలింది. TVK ఎమ్మెల్యే ఫిర్యాదు ప్రకారం, ఒక ప్రైవేట్ సంస్థ, యూట్యూబర్లతో కలిసి మాజీ మంత్రి, ఆయన సోదరుడు ప్రభుత్వాన్ని కూల్చే కుట్ర పన్నారని ఆరోపిస్తున్నారు. ఈ కుట్ర కోసం సుమారు 180 నుంచి 200 కోట్ల రూపాయల వరకు డీల్ జరిగిందని, TVK ఎమ్మెల్యేలను కొనుగోలు చేసే ప్రయత్నాలు చేశారని ఫిర్యాదులో పేర్కొన్నారు.

ఈ ఆరోపణలను DMK పార్టీ ఖండించింది. కుట్రతో తమకు ఎలాంటి సంబంధం లేదని, నిష్పక్షపాతంగా దర్యాప్తు జరగాలని DMK నేతలు స్పష్టం చేశారు. తప్పు చేసిన వారిపై చర్యలు తీసుకోవాలని, రాజకీయ ఉద్దేశంతో తమపై ఆరోపణలు చేస్తే తిప్పికొడతామని వారు హెచ్చరించారు. ప్రభుత్వ ఏర్పాటుకు సహకరించామని, విధానాలపై పోరాడతామే తప్ప కుట్ర చేయబోమని DMK పేర్కొంది.

మాజీ మంత్రి సెల్ బాలాజీ, ఆయన సోదరుడిని పట్టుకునేందుకు మూడు ప్రత్యేక పోలీసు బృందాలు గాలింపు చర్యలు సాగిస్తున్నాయి. త్వరలోనే వారిని అదుపులోకి తీసుకుంటామని అధికారులు తెలిపారు. వారిని ప్రశ్నించిన తర్వాతే ఈ కుట్ర వెనుక ఉన్న ఇతరుల వివరాలు వెల్లడయ్యే అవకాశం ఉంది.