సెన్సెక్స్ 600 పాయింట్లు పతనం, నిఫ్టీ 24,300కు; క్రూడ్ ఆయిల్, అమెరికా-ఇరాన్ టెన్షన్లు భారం

దేశీయ స్టాక్ మార్కెట్లు భారీ నష్టాల్లో ముగిశాయి. సెన్సెక్స్ 500 నుంచి 600 పాయింట్లు పతనమై, నిఫ్టీ 24,300 పాయింట్ల దిగువకు చేరింది.

ప్రధాన కారణాలు అంతర్జాతీయ క్రూడ్ ఆయిల్ ధరల పెరుగుదల, అమెరికా-ఇరాన్ మధ్య హర్మోజ్ జలసంధిపై ఉద్రిక్తతలు. బ్రెంట్ క్రూడ్ బ్యారెల్ ధర 89 డాలర్లు దాటి 90 డాలర్ల స్థాయికి చేరుకోవడం మార్కెట్ సెంటిమెంట్‌ను దెబ్బతీసింది. అలాగే ఎగుమతులు తగ్గడం, దిగుమతులు పెరగడంతో డాలర్‌తో రూపాయి మారకం విలువ 95కి పడిపోయింది.

కోల్ ఇండియా, ఎటర్నల్, గ్రాసిం, హెచ్‌సీఎల్ టెక్, హెచ్‌డీఎఫ్‌సీ లైఫ్, ఏషియన్ పెయింట్స్, బజాజ్ ఆటో షేర్లు నష్టపోయాయి. ఇండిగో, జియో ఫినాన్షియల్, సిప్లా, కోటక్ బ్యాంక్ షేర్లు లాభాల్లో ఉన్నాయి. ఐటీ, ఆటోమొబైల్, బ్యాంకింగ్, ఫైనాన్స్, రిటైల్ రంగాల్లో ప్రాఫిట్ బుకింగ్ ఎక్కువగా కనిపించింది. మిడ్‌క్యాప్ స్టాక్‌లు మాత్రం పెరిగాయి. పీఎస్‌యూ బ్యాంకులు మంచి లాభాలతో రాణించాయి. మెటల్స్, గోల్డ్, సిల్వర్ కూడా లాభాల్లో ఉన్నాయి.

స్టాక్ మార్కెట్ నిపుణుడు శ్రీరామచంద్రమూర్తి మాట్లాడుతూ, ప్రస్తుత పతనం ఒక కరెక్షన్ మాత్రమేనని, ఇది పూర్తి స్థాయి బేరిష్ ట్రెండ్ కాదని చెప్పారు. నిఫ్టీ 24,200 వద్ద సపోర్ట్ పొందే అవకాశం ఉందని, బ్యాంక్ నిఫ్టీ 58,900 వద్ద పాజిటివ్‌గా ఉందని తెలిపారు. చార్టులన్నీ పాజిటివ్ సూచిస్తున్నాయని, దీర్ఘకాలిక ఇన్వెస్టర్లు బై ఆన్ డిప్ వ్యూహాన్ని అనుసరించాలని సూచించారు. ఐటీ, రియాల్టీ, ఫార్మా రంగాల్లో కొన్ని మంచి స్టాక్‌లు ప్రస్తుతం తగ్గాయని, వాటిల్లో ఇన్వెస్ట్ చేయడం లాభదాయకమని అభిప్రాయపడ్డారు.

అమెరికా-ఇరాన్ మధ్య హర్మోజ్ జలసంధిపై యుద్ధం జరిగే పరిస్థితి లేదని, షిప్పింగ్‌కు అంతరాయం కలిగితే తప్ప క్రూడ్ ధరలు 90-95 డాలర్ల మధ్యే స్థిరంగా ఉంటాయని విశ్లేషకుడు అభిప్రాయపడ్డారు. అమెరికా ఆ జలసంధి తమ ఆధీనంలో ఉందని ప్రకటించినా, అది ఇంకా నిర్ధారణ కాలేదు.