షాద్‌నగర్ నగల దుకాణంలో చోరీ: 24 గంటల్లోనే నిందితురాలి అరెస్టు

నగల దుకాణంలో బంగారు గొలుసు దొంగిలించిన మహిళను షాద్‌నగర్ పోలీసులు 24 గంటల్లోనే అరెస్టు చేశారు. రంగారెడ్డి జిల్లాలోని ఫ్యూచర్ సిటీ పోలీస్ కమిషనరేట్ పరిధిలో ఈ చోరీ జరిగింది. నిందితురాలిని మహబూబ్‌నగర్ జిల్లాకు చెందిన కుమ్మరి రాజమ్మగా పోలీసులు గుర్తించారు.

పోలీసుల కథనం ప్రకారం, షాద్‌నగర్ చౌరస్తాలోని శ్రీకృష్ణ జ్యువెలర్స్‌లో నిన్న ఈ చోరీ జరిగింది. చెవి దిద్దులు కొనాలని వచ్చిన ఆమె, సిబ్బంది దృష్టి మళ్లించి షోకేస్‌లోని రెండున్నర తులాల పుస్తెల తాడును తీసుకుంది. మళ్లీ వస్తానని చెప్పి ఆమె అక్కడి నుంచి వెళ్లిపోయింది. దుకాణం యజమాని రఘువీర్ గుప్తా ఫిర్యాదు మేరకు కేసు నమోదు చేశారు.

సీసీ కెమెరాల ఫుటేజీ ఆధారంగా దర్యాప్తు చేపట్టిన పోలీసులు, షాద్‌నగర్ పరిధిలో ఏర్పాటు చేసిన 120 కెమెరాలను పరిశీలించారు. ఆమె బస్ స్టాండ్‌కు వెళ్లి ఆటో ఎక్కినట్టు గుర్తించారు. ఈరోజు మధ్యాహ్నం ఆమెను పట్టుకున్నారు. చోరీకి గురైన నగలను ఆమె నుంచి స్వాధీనం చేసుకున్నారు.

ఇంతకుముందు ఆమె మరో నగల దుకాణంలోనూ అటెన్షన్ డైవర్షన్ చేయడానికి ప్రయత్నించినట్టు పోలీసులు తెలిపారు. అది విఫలమైన తర్వాత శ్రీకృష్ణ జ్యువెలర్స్‌కు ఆమె వచ్చింది. దసరా సమయంలో మణికంట క్లాస్ షోరూమ్‌లో జరిగిన ఘటనకు సంబంధించిన ఫుటేజీని కూడా పోలీసులు పరిశీలించారు.

ప్రతి షాపులో, ఇళ్లలో సీసీ కెమెరాలు ఏర్పాటు చేస్తే నిందితులను వేగంగా పట్టుకోవడానికి 90 శాతం అవకాశం ఉంటుందని పోలీసులు సూచించారు. నిందితురాలిని రిమాండ్‌కు తరలించినట్టు వారు తెలిపారు.