ఇంద్రకీలాద్రిపై శాకంబరి మహోత్సవాలు ప్రారంభం.. కూరగాయలతో అమ్మవారి అలంకరణ

విజయవాడ ఇంద్రకీలాద్రిపై శాకంబరి మహోత్సవాలు ప్రారంభమయ్యాయి. కనక దుర్గమ్మ అమ్మవారు ప్రకృతి స్వరూపిణిగా మూడు రోజుల పాటు కూరగాయలు, ఆకుకూరలు, పండ్లు, డ్రై ఫ్రూట్స్‌తో ప్రత్యేక అలంకరణలో దర్శనమివ్వనున్నారు.

తొలి రోజు తాజా కూరగాయలతో, రెండవ రోజు ఆకుకూరలతో తయారైన దండలతో, మూడవ రోజు ఆషాఢ పౌర్ణమి సందర్భంగా రకరకాల పండ్లు, డ్రై ఫ్రూట్స్‌తో అమ్మవారిని అలంకరిస్తారు. దేవస్థానం అధికారులు ఇప్పటికే 24 టన్నుల కూరగాయలను, మరో 4 టన్నుల పండ్లను సేకరించారు.

ఈ సంవత్సరం మార్కెట్‌లో కూరగాయల కొరత ఉన్నప్పటికీ, రైతులు, వ్యాపారులు భక్తితో విరాళంగా ఇచ్చిన కూరగాయలను దేవస్థానం సేకరించింది. దేవస్థానం ఈవో మాట్లాడుతూ, ముఖ్యమంత్రి సూచన మేరకు భక్తులకు ఎలాంటి ఇబ్బంది లేకుండా సౌకర్యాలు కల్పించామని తెలిపారు. ఈ మూడు రోజుల పాటు భక్తుల రద్దీ ఎక్కువగా ఉంటుందని, సిబ్బంది అన్ని ఏర్పాట్లు చేశారని చెప్పారు.