నీట్ పేపర్ లీక్‌ల నివారణే కీలకం, శిక్షలతో సమస్య తీరదు: శశి థరూర్

పార్లమెంటులో నీట్ సహా వివిధ ప్రవేశ పరీక్షల పేపర్ లీక్‌లపై ప్రవేశపెట్టిన బిల్లుపై కాంగ్రెస్ ఎంపీ శశి థరూర్ తీవ్ర వ్యతిరేకత వ్యక్తం చేశారు. ప్రభుత్వం తీసుకొచ్చిన ఈ బిల్లు శిక్షలపై మాత్రమే దృష్టి పెట్టిందని, పేపర్ లీక్‌లను నివారించేందుకు ఎటువంటి చర్యలు చేపట్టలేదని ఆయన విమర్శించారు. ఈ బిల్లు ప్రకారం పేపర్ లీక్ చేస్తే 10 సంవత్సరాల జైలు, 10 కోట్ల జరిమానా విధించవచ్చు. అయితే ఇది నేరం జరిగిన తర్వాత శిక్షించే విధానమేనని, వ్యవస్థలో మార్పు లేకపోతే ఇలాంటి ఘటనలు ఆగవని థరూర్ హెచ్చరించారు. ఎన్టీఏ (నేషనల్ టెస్టింగ్ ఏజెన్సీ) నిర్వహణ సామర్థ్యంపై ఆయన విస్తృతంగా లెక్కలు చూపించారు. ఎన్టీఏ 14 పెద్ద పరీక్షలు నిర్వహించగా, అందులో 6 పరీక్షల్లో పేపర్ లీక్ ఆరోపణలు వచ్చాయని, గత ఏడేళ్లలో 15 పరీక్షలను అనేక కారణాలతో వాయిదా వేయాల్సి వచ్చిందని తెలిపారు. ఇదంతా ఎన్టీఏలో సిబ్బంది కొరత కారణంగా జరుగుతోందన్నారు. ఎన్టీఏలో 39 శాశ్వత పోస్టులు ఉండగా, 15 ఖాళీగా ఉన్నాయని, మిగిలిన 24 మందితోనే అన్ని పరీక్షల నిర్వహణ జరుగుతోందని వాస్తవాలు చెప్పారు. ఫాస్ట్‌ట్రాక్ కోర్టుల స్థితిని కూడా థరూర్ ఎత్తిచూపారు. ప్రస్తుతం దేశంలో ఫాస్ట్‌ట్రాక్ కోర్టుల్లో 2024లో 1,44,444 కేసులు నమోదై ఉండగా, పరిష్కారమైన కేసులు కేవలం 66,000 మాత్రమే. పెండింగ్ కేసులు 2.5 లక్షలు దాటాయని, ఇటువంటి పరిస్థితుల్లో రెండు నెలల్లో దర్యాప్తు పూర్తి, మూడు నెలల్లో తీర్పు అనడం ఆచరణ సాధ్యం కాదని వివరించారు. వ్యవస్థాపరమైన లోపాల వల్లే విద్యార్థుల భవిష్యత్తు నాశనమవుతోందని, 21 మంది విద్యార్థులు పేపర్ లీక్‌ల కారణంగా ఆత్మహత్య చేసుకున్నారని థరూర్ ఆవేదన వ్యక్తం చేశారు. “పిల్లల కలలు అమ్ముకుంటున్న వారిని శిక్షించాలి, కానీ ఆ శిక్ష నేరం జరిగిన తర్వాత కాకుండా, నేరం జరగకుండా నివారించే వ్యవస్థ రూపొందించాలి” అని ఆయన అన్నారు. 100 సూచనలతో కమిటీ నియమించి, రెండేళ్ల తర్వాత 34 సూచనలను అమలు చేశామని చెప్పడం వల్ల ఉపయోగం లేదని, మళ్లీ కొత్తగా పేపర్ లీక్‌లు జరిగాయని, మరో కమిటీ నియమించారని, ఇలా చేస్తే ఇంకా విషాదాలు జరుగుతాయని హెచ్చరించారు. చివరగా “ఇక మీదట ఇలాంటిది జరగకుండా ప్రయత్నిద్దాం” అని లోక్‌సభలో తన ప్రసంగాన్ని ముగించారు.