పార్లమెంట్ నిలిచిపోవడం ప్రజాస్వామ్యానికి హానికరం: శశి థరూర్

లోక్సభ, రాజ్యసభల్లో నెలకొన్న ప్రతిష్టంభనపై కాంగ్రెస్ ఎంపీ శశి థరూర్ తీవ్ర అసంతృప్తి వ్యక్తం చేశారు. ప్రజాస్వామ్యానికి సంభాషణ ప్రాణం లాంటిదని, ప్రభుత్వం ప్రతిపక్షంతో చర్చలు జరపకపోవడం పార్లమెంట్ వైఫల్యానికి దారితీస్తోందన్నారు. బ్రిజ్ భూషణ్ శరణ్ సింగ్ కేసులో ఢిల్లీ కోర్టు తీర్పుపై స్పందించాల్సిందిగా ET Now ఇంటర్వ్యూలో కోరగా, కోర్టు తీర్పులపై తాను వ్యాఖ్యానించనని, న్యాయ ప్రక్రియ జరగాల్సి ఉందన్నారు. అప్పీల్ వేస్తే తదుపరి దశలో ఏం జరుగుతుందో చూడాలన్నారు. అప్పీల్ లేకపోతే ఆయనను గౌరవప్రదంగా విడుదలైన వ్యక్తిగా పరిగణించవచ్చన్నారు.

పార్లమెంట్ వ్యవహారాలపై థరూర్ మాట్లాడుతూ, పార్లమెంట్ సమావేశాలు స్తంభించడం నిరాశ కలిగించిందన్నారు. తాను పన్నెండేళ్లుగా పార్లమెంటును ప్రతిపక్షానికి పెద్ద ఆయుధంగా భావిస్తున్నానని, సభలో మంత్రులను ప్రశ్నించే, నియోజకవర్గ సమస్యలు లేవనెత్తే, తమ వాదనలు రికార్డు చేసే అవకాశం ఉంటుందని వివరించారు. ఒకసారి న్యాయమూర్తి గమనించిన విషయాన్ని ప్రస్తావిస్తూ, బిల్లులు చర్చ లేకుండా ఆమోదించబడితే, వాటి ఉద్దేశ్యం తెలియదని, అది న్యాయస్థానాలకు కూడా ఇబ్బందిగా ఉంటుందన్నారు. అందుకే మెజారిటీ ఉన్నా ప్రతిపక్షం మాట్లాడి తన అభిప్రాయాలు నమోదు చేయాలని సూచించారు.

ప్రభుత్వం, ప్రతిపక్షం మధ్య సంభాషణ లేమి వల్లే ఈ దుస్థితి ఏర్పడిందని థరూర్ అభిప్రాయపడ్డారు. పార్లమెంట్ సక్రమంగా నడవడం ప్రభుత్వానికీ లాభమని, కాబట్టి వారు ప్రతిపక్షంతో చర్చలు జరపాల్సిన బాధ్యత ఉందన్నారు. అయితే ఇప్పుడు ప్రభుత్వం తగినంతగా ఇచ్చిపుచ్చుకునే ధోరణి కనిపించడం లేదని, ఇది ప్రజాస్వామ్య ఆరోగ్యానికి మంచిది కాదని హెచ్చరించారు. వన్ నేషన్ వన్ ఎలక్షన్, డీలిమిటేషన్, మహిళా రిజర్వేషన్ వంటి కీలక బిల్లులు రాబోతున్నందున ప్రభుత్వం సహకార ధోరణి అవలంబించాలని ఆశిస్తున్నట్లు తెలిపారు.