హైదరాబాద్‌లో ఈవ్‌టీజింగ్ కేసుల్లో అధికంగా 18-24 ఏళ్ల యువకులు: షీ టీమ్స్ వెల్లడి

హైదరాబాద్‌లో మహిళలపై వేధింపుల కేసుల్లో ప్రధానంగా 18 నుంచి 24 ఏళ్ల వయసున్న యువకులే ఉన్నట్లు షీ టీమ్స్ దర్యాప్తులో తేలింది. కొందరు మైనర్లు, 50 ఏళ్లు దాటిన వారు కూడా నిందితులుగా బయటపడ్డారు.

హైదరాబాద్, సైబరాబాద్, మల్కాజగిరి పోలీస్ కమిషనరేట్ల పరిధిలో షీ టీమ్స్ నిరంతరం నిఘా పెడుతోంది. మెట్రో స్టేషన్లు, బస్ స్టాప్‌లు, షాపింగ్ మాల్స్ వంటి రద్దీ ప్రాంతాల్లో డెకాయ ఆపరేషన్లు నిర్వహిస్తూ నేరస్థులను పట్టుకుంటున్నారు. నమోదైన కేసుల్లో ఎక్కువగా విద్యార్థులు, ప్రైవేట్ ఉద్యోగులు, నిరుద్యోగులు ఉన్నట్లు పోలీసులు తెలిపారు.

మైనర్లు ఈవ్ టీజింగ్‌కు పాల్పడితే వారి తల్లిదండ్రుల సమక్షంలో కౌన్సెలింగ్ ఇచ్చి, భవిష్యత్తులో ఇలాంటి చర్యలు చేయవద్దని హెచ్చరిస్తున్నారు. మూడు కమిషనరేట్ల పరిధిలో జరిగిన మెగా కౌన్సెలింగ్ కార్యక్రమాల్లో 180 మందికి పైగా వ్యక్తులకు కుటుంబ సభ్యుల ఎదుట అవగాహన కల్పించారు.

మహిళా భద్రతపై షీ టీమ్స్ పర్యవేక్షణను మరింత విస్తరిస్తున్నట్లు అధికారులు తెలిపారు. వేధింపులు, ఈవ్ టీజింగ్ వంటి నేరాలపై కఠినంగా వ్యవహరిస్తున్నారు. ఎవరైనా వేధింపులకు గురైతే వెంటనే 100 లేదా 1930 నంబర్‌లకు ఫోన్ చేసి ఫిర్యాదు చేయాలని పోలీసులు సూచించారు.