దిల్లీ క్రైమ్ సీజన్‌ల నా కెరీర్‌లో టర్నింగ్ పాయింట్ : షెఫాలీ షా

నటి షెఫాలీ షా ‘దిల్లీ క్రైమ్’ ఫ్రాంఛైజీ తన కెరీర్‌లో పెద్ద మలుపు అని చెప్పారు. బాలీవుడ్ హంగామాకు ఇచ్చిన ఇంటర్వ్యూలో ఆమె ఈ విషయం వెల్లడించారు. తాను సాంప్రదాయ హీరోయిన్‌లా కనిపించనప్పటికీ, కథకు ప్రధానంగా నిలిచే అవకాశం ‘దిల్లీ క్రైమ్’ ఇచ్చిందని, అది ఊహించని పరిణామమని ఆమె వివరించారు.

మూడో సీజన్ చిత్రీకరణకు ముందు తాను చాలా భయపడ్డానని షెఫాలీ చెప్పారు. మొదటి రెండు సీజన్లు దర్శకుడు రిషి మెహతా చేశారు. అయితే, రెండో సీజన్ తర్వాత ఆయన ఆ ప్రాజెక్టును వదిలేయడంతో తనకు దిగ్భ్రాంతి కలిగిందన్నారు. ‘ఇది రిషి ప్రాణంలా పెంచుకున్న కథ. అతనితో నాకున్న కెమిస్ట్రీ చాలా బలంగా ఉంది. దాంతో నేను విరిగిపోయాను’ అని షెఫాలీ గుర్తుచేసుకున్నారు. కానీ, కొత్త దర్శకుడు తనుజ్ చోప్రా అడుగుపెట్టి, మూడో సీజన్‌ను చక్కగా నడిపించారని ప్రశంసించారు.

ఈ సీజన్‌లో వర్తిక పాత్రపై షెఫాలీ ఆసక్తికర విశ్లేషణ చేశారు. ‘వర్తిక ప్రమోషన్ పేరుతో ఢిల్లీ నుంచి దూరంగా మిజోరాం పంపించబడింది. ఆ బాధ, అవమానం మోసుకుంటూ మళ్లీ ఢిల్లీ వస్తుంది. మూడో సీజన్‌లో ఆమెలో ఎలాంటి దర్జా లేదు. నేను ఈ పాత్రను ఎటువంటి డ్రామా లేకుండా, చాలా లోపలికి లాగుకుని నటించాను’ అని వివరించారు. ఇలాంటి నటన ప్రేక్షకులకు రీచ్ కాకపోవచ్చని తాను భయపడ్డానని, కానీ స్పందన చూసి ఊరట చెందానని చెప్పారు.

అసలు సీజన్‌ సిద్ధమయ్యే ముందు, నిర్భయ కేసును ఛేదించిన ఐపీఎస్ అధికారి ఛాయా శర్మతో తాను నేరుగా గంటల తరబడి మాట్లాడానని, వారి ప్రోటోకాల్‌, మనస్తత్వం అర్థం చేసుకున్నానని షెఫాలీ పేర్కొన్నారు. ఛాయా శర్మ తనకు స్ఫూర్తిగా నిలిచారని, ఆమె ఇచ్చిన ఫీడ్బ్యాక్ ఎంతో విలువైనదని తెలిపారు. సీజన్ 3 విడుదల తర్వాత రిషి మెహతా పంపిన ‘నువ్వెప్పుడూ తడబడవు’ అనే సందేశం తనకు ఎంతో ధైర్యమిచ్చిందని షెఫాలీ ఆ ఇంటర్వ్యూలో పంచుకున్నారు.