దక్షిణ చైనాలో వరదలు: 6 మంది మృతి, 11 మంది గల్లంతు

దక్షిణ చైనాలో మైసెక్ తుఫాను కారణంగా కురుస్తున్న భారీ వర్షాలు వరదలకు దారితీశాయి. ఈ వరదల్లో ఇప్పటివరకు 6 మంది మృతి చెందగా, 11 మంది కనిపించకుండా పోయారు.

గ్వాంగ్జీ, గ్వాంగ్డాంగ్ ప్రావిన్సుల్లో పరిస్థితి తీవ్రంగా ఉంది. గ్వాంగ్జీలో సుమారు 3,75,000 మంది ప్రభావితమయ్యారు. 30,000 మందిని సురక్షిత ప్రాంతాలకు తరలించారు.

8,000 మందికి పైగా సిబ్బంది, 1,700 వాహనాలు, 5,700 పడవలతో రెస్క్యూ చర్యలు కొనసాగుతున్నాయి. వరదల కారణంగా పలుచోట్ల ఇళ్లు, వాహనాలు నీట మునిగాయి. ఈదురుగాలులతో చెట్లు విరిగిపడ్డాయి.

గ్వాంగ్జీలో 55 నదులు ప్రమాదకర స్థాయికి చేరుకున్నాయి. 341 జలాశయాలు పూర్తి సామర్థ్యంతో నిండాయి. రాబోయే 24 గంటల్లో నదీ తీర ప్రాంతాల్లో పరిస్థితి ఆందోళనకరంగా ఉంటుందని అధికారులు హెచ్చరించారు.

గ్వాంగ్డాంగ్లో జిజియాంగ్ నది ఉద్ధృతంగా ప్రవహిస్తుండటంతో ఫెంకై కౌంటీకి రెడ్ అలర్ట్ జారీ చేశారు. రానున్న మూడు రోజులు భారీ వర్షాలు కురిసే అవకాశం ఉన్నందున ముందస్తు హెచ్చరికలు జారీ చేశారు.