జైలు శిక్ష, ప్రాణహాని ఎదురైనా బంగ్లాదేశ్ వెళ్తానని షేక్ హసీనా ప్రకటన

బంగ్లాదేశ్ ప్రజాస్వామ్యం, న్యాయం పునరుద్ధరించేందుకు తాను స్వదేశం తిరిగి వెళ్తానని మాజీ ప్రధాని షేక్ హసీనా ప్రకటించారు. జైలు శిక్ష లేదా ప్రాణహాని వంటి ఏ పరిస్థితినైనా ఎదుర్కోవడానికి సిద్ధమని ఆమె తెలిపారు.

రెండేళ్ల క్రితం బంగ్లాదేశ్ లో ప్రభుత్వ వ్యతిరేక ఆందోళనల నేపథ్యంలో ఆమె దేశం విడిచి భారత్ కు వచ్చారు. తొలిసారిగా భారత్ నుంచి వర్చువల్ మీడియా సమావేశంలో మాట్లాడుతూ, తాను అధికారం కోసం కాకుండా బంగ్లాదేశ్ అభివృద్ధి, ప్రజల శ్రేయస్సు కోసమే తిరిగి వెళ్తున్నానని హసీనా చెప్పారు. "నన్ను జైల్లో పెట్టవచ్చు, చంపవచ్చు. కానీ నేను నా ప్రజలతో ఉండేందుకు స్వదేశానికి వెళ్తా" అని ఆమె అన్నారు.

2022 లో జరిగిన ఉద్యమం శాంతియుతమైంది కాదని, కొందరు దాన్ని హింసాత్మకంగా మార్చారని హసీనా ఆరోపించారు. ప్రస్తుతం బంగ్లాదేశ్ లో ప్రతిచోటా భయాందోళనలు నెలకొన్నాయని, ప్రజాస్వామ్యం, న్యాయం కోసం అక్కడి ప్రజలు చేస్తున్న పోరాటానికి అంతర్జాతీయ సమాజం మద్దతు ఇవ్వాలని ఆమె విజ్ఞప్తి చేశారు.

ఇదిలా ఉండగా, బంగ్లాదేశ్ లో శాంతిభద్రతలు లేవని, అది విఫలమైన దేశంగా మారిందని హసీనా కుమారుడు సజీబ్ వాజిద్ జాయ్ ఆరోపించారు. బంగ్లాదేశ్ మరో పాకిస్తాన్ గా మారితే అది భారత్ కు అత్యంత ఆందోళన కలిగించే అంశం అని ఆయన పేర్కొన్నారు.