రామాయణ సినిమా నిర్మాతలకు శ్రీ రామలీలా మహాసంఘం హెచ్చరిక: సినిమా చూపించాలని డిమాండ్

శ్రీ రామలీలా మహాసంఘం అధ్యక్షుడు అర్జున్ కుమార్ రామాయణ సినిమా నిర్మాణ బృందానికి లేఖ రాశారు. సినిమా ట్రైలర్‌లో కొన్ని సన్నివేశాలు తమకు అసంతృప్తి కలిగించాయని, భావోద్వేగాలు సరిగ్గా లేవని ఆ లేఖలో పేర్కొన్నారు. హిందూ మత విశ్వాసాలు, మనోభావాలు దెబ్బతినకుండా చూడాలనే లక్ష్యంతోనే ఈ లేఖ రాశామని అర్జున్ కుమార్ తెలిపారు.

రామాయణ సినిమాను రిలీజ్ చేయడానికి ముందు తమకు ప్రత్యేకంగా చూపించాలని డిమాండ్ చేశారు. ఆదిపురుష్ సినిమాపై వచ్చిన వ్యతిరేకత నేపథ్యంలో, రామాయణ విషయంలో ముందస్తు చర్యలు తీసుకుంటున్నామని అన్నారు. సినిమా చూపించకుండా రిలీజ్ చేస్తే తీవ్ర నిరసనలు ఎదుర్కోవాల్సి వస్తుందని హెచ్చరించారు. ఈ విషయంపై నిర్మాతల నుంచి ఇంకా స్పందన రాలేదు.

నితీష్ తివారి దర్శకత్వంలో తెరకెక్కుతున్న ఈ రామాయణ చిత్రంలో రాముడిగా రణ్‌బీర్ కపూర్, సీతగా సాయి పల్లవి, రావణుడిగా యశ్ నటిస్తున్నారు. ఇది సుమారు 4,000 కోట్ల బడ్జెట్‌తో రెండు భాగాలుగా రూపొందుతోంది. యశ్, నమిత్ మల్హోత్ర ఈ చిత్రాన్ని నిర్మిస్తున్నారు. ఫస్ట్ పార్ట్ 2025 దీపావళికి, సెకండ్ పార్ట్ 2027 దీపావళికి రిలీజ్ కానుంది. ట్రైలర్ విడుదలైనప్పటి నుంచి సీత పాత్రలో సాయి పల్లవిపై సోషల్ మీడియాలో విమర్శలు, ట్రోలింగ్ జరుగుతున్నాయి.