సిద్దిపేట DRC మీటింగ్‌లో రీల్స్ చూసిన అధికారులు; వీడియో వైరల్

సిద్దిపేట జిల్లా కలెక్టరేట్‌లో జరిగిన జిల్లా అభివృద్ధి సమీక్ష కమిటీ (DRC) సమావేశంలో కొందరు అధికారులు మొబైల్ ఫోన్లలో రీల్స్ చూస్తూ కనిపించారు.

ఈ సమావేశంలో జిల్లా ఇంచార్జ్ మంత్రి వివేక్ వెంకటస్వామి, మాజీ మంత్రి హరీష్ రావ్, ఎంపి రఘునందన్ రావు తదితరులు పాల్గొన్నారు. సుమారు ఆరు గంటల పాటు అభివృద్ధి పనులు, సంక్షేమ పథకాలు, తాగునీరు, సాగునీరు, విద్య, వైద్యం వంటి అంశాలపై చర్చ జరిగింది.

చర్చ సమయంలో కొందరు అధికారులు సమావేశంపై దృష్టి పెట్టకుండా సోషల్ మీడియా రీల్స్ చూస్తున్న దృశ్యాలు వీడియోలో రికార్డయ్యాయి. ఈ వీడియోలు సోషల్ మీడియాలో వైరల్ కావడంతో ప్రజల నుంచి విమర్శలు వచ్చాయి.

ప్రభుత్వ ఉద్యోగులు ప్రజా సమస్యల చర్చ సమయంలో ఇలా ప్రవర్తించడం సరికాదని, వీరిపై చర్యలు తీసుకోవాలని నెటిజన్లు డిమాండ్ చేస్తున్నారు. ఈ ఘటనపై ఉన్నతాధికారులు ఇంకా స్పందించలేదు.