ధ్వజస్తంభం ప్రాముఖ్యత ఏమిటి? ఆలయంలో దాని పాత్ర, విధివిధానాలు

ఆలయ నిర్మాణంలో ధ్వజస్తంభానికి ప్రత్యేక ప్రాముఖ్యత ఉంది. వాస్తు రీత్యా దీన్ని దేవాలయ వెన్నెముకగా పరిగణిస్తారు. మానవ శరీరంలో వెన్నెముక ఎలాగో, ఆలయంలో ధ్వజస్తంభం అలాంటిది. ధ్వజస్తంభం పక్కనే బలిపీఠం ఉంటుంది. దాన్ని తాకకుండా నమస్కరించాలి.

ధ్వజస్తంభం మూలమూర్తికి ప్రతినిధిగా భావిస్తారు. దూర ప్రాంతాల నుంచి వచ్చిన భక్తులు కేవలం ధ్వజస్తంభ దర్శనం చేసినా గర్భాలయంలోని దేవుడ్ని దర్శించినంత పుణ్యం లభిస్తుందని పెద్దలు చెప్పారు. కార్తీక మాసంలో ఆకాశ దీపం ధ్వజస్తంభం మీదే పెడతారు.

ప్రతి రోజు నైవేద్యం సమయంలో బలిపీఠాలన్నింటికీ బలి సమర్పణ చేస్తారు. బ్రహ్మోత్సవాల సమయంలో ధ్వజారోహణం జరుగుతుంది. వైష్ణవాలయాల్లో గరుత్మంతుని చిత్రం, శివాలయంలో నందీశ్వరుడి చిత్రం ఉన్న ధ్వజాన్ని ఎగురవేస్తారు. ధ్వజస్తంభం నుంచే ఆలయ పవిత్ర హద్దు మొదలవుతుంది. సాష్టాంగ నమస్కారాలు ధ్వజస్తంభానికి ఇవతలే చేయాలి.

ధ్వజస్తంభాలు రాతితోగానీ, దారువుతోగానీ నిర్మిస్తారు. ఇది భగవంతుడి ప్రతిరూపంగా నిలుస్తుంది. ఈ ప్రాంగణంలో పవిత్ర భావనతో ప్రవేశించాలని సంప్రదాయం బోధిస్తోంది.