సింహాద్రి అప్పన్న గిరి ప్రదక్షిణ ప్రారంభం, లక్షలాది మంది భక్తులు పాల్గొంటున్నారు

సింహాద్రి అప్పన్న గిరి ప్రదక్షిణ ఈ రోజు ఉదయం నుండి ప్రారంభమైంది. 32 కిలోమీటర్ల దూరం పాటు జరిగే ఈ గిరి ప్రదక్షిణలో భక్తులు అధిక సంఖ్యలో పాల్గొంటున్నారు. తొలిపావంచ వద్ద కొబ్బరికాయలు కొట్టి మొక్కులు చెల్లించుకుంటూ భక్తులు ప్రదక్షిణ ప్రారంభించారు.

ఈ రోజు మధ్యాహ్నం స్వామి వారి దివ్యరథం ప్రారంభం కానుంది. రథం ప్రారంభమైన తర్వాత భక్తుల సంఖ్య మరింత పెరిగే అవకాశం ఉంది. గత సంవత్సరం సుమారు 7 లక్షల మంది హాజరు కాగా, ఈసారి 10 లక్షల వరకు చేరుకోవచ్చని అంచనా.

భక్తుల కోసం ప్రత్యేక ఏర్పాట్లు చేశారు. ట్రాఫిక్ ఇబ్బందులు రాకుండా కమాండ్ కంట్రోల్ రూమ్‌లు, బారికేడ్లు ఏర్పాటు చేశారు. APSRTC 50 ప్రత్యేక బస్సులు నడుపుతోంది. రాష్ట్రంలోని వివిధ ప్రాంతాలు, ఇతర రాష్ట్రాల నుండి కూడా భక్తులు పెద్ద ఎత్తున హాజరవుతున్నారు.

విశాఖకు చెందిన ఓ భక్తురాలు మాట్లాడుతూ, ప్రతి ఏడాది గిరి ప్రదక్షిణలో పాల్గొంటానని, ఇక్కడికి వచ్చిన తర్వాత ఎటువంటి నొప్పులు ఉండవని తెలిపారు. యువత, మహిళలు, వృద్ధులు అనేక మంది ఉత్సాహంగా ప్రదక్షిణలో పాల్గొంటున్నారు.