సింహాచలంలో ఆషాడ పౌర్ణమి గిరి ప్రదక్షిణ: 5 లక్షల మంది భక్తులకు ఏర్పాట్లు

ఆషాడ పౌర్ణమి సందర్భంగా సింహాచలంలో జూన్ 28న జరిగే గిరి ప్రదక్షిణకు దేవస్థానం అధికారులు సకల ఏర్పాట్లు చేశారు. 32 కిలోమీటర్ల మేర సాగే ఈ పవిత్ర ప్రదక్షిణకు 5 లక్షల నుంచి 8 లక్షల మంది భక్తులు హాజరుకానున్నట్లు అంచనా వేస్తున్నారు.

భక్తుల సౌకర్యం కోసం ప్రదక్షిణ మార్గంలో 28 సహాయ కేంద్రాలు, 7 కంట్రోల్ రూమ్‌లు, ఒక కమాండ్ కంట్రోల్ రూమ్‌ను ఏర్పాటు చేశారు. మంచినీరు, ప్రసాదాలు, వైద్య శిబిరాలు, ప్రత్యేక లైటింగ్, సీసీ కెమెరాలతో పాటు చిన్నారుల భద్రత కోసం ఆర్ఎఫ్‌ఐడీ ట్యాగ్‌లను అందుబాటులో ఉంచారు.

ఎలాంటి అవాంఛనీయ సంఘటనలు జరగకుండా 90 మంది నైపుణ్యం కలిగిన ఈతగాళ్లు, 5 వేల మందికి పైగా సిబ్బంది, వాలంటీర్లు విధుల్లో ఉన్నారు. రద్దీ నియంత్రణ కోసం హనుమంతవాక, వేపగుంట, ఆనందపురం ప్రాంతాల్లో ట్రాఫిక్ డైవర్షన్లు చేపట్టారు. భక్తులను కొండపైకి చేర్చేందుకు 50 ప్రత్యేక ఆర్టీసీ బస్సులు నడుపుతున్నారు. ప్రదక్షిణ జరిగే పరిధిలోని 221 విద్యా సంస్థలకు ప్రభుత్వం సెలవు ప్రకటించింది.

గిరి ప్రదక్షిణ తర్వాత జూన్ 29న ఆలయ ప్రదక్షిణ జరుగుతుంది. రెండు రోజుల పాటు స్వామివారి ఆర్చిత సేవలను రద్దు చేసి భక్తుల దర్శనానికి అవకాశం కల్పించారు. మధ్యాహ్నం 2 గంటలకు అనువంశిక ధర్మకర్త చేతుల మీదుగా స్వామి వారి పుష్పరథ ప్రయాణం ప్రారంభమవుతుంది. అన్ని ఏర్పాట్లు పూర్తయినట్లు ఆలయ ఈఓ వెంకట్రావు తెలిపారు.